Azərbaycan, Bakı, 28 mart /Trend, müxbir Ü.İsmayılova/
Azərbaycanın sığorta şirkəti "Alfa Sığorta" Maliyyə Nazirliyinə həyat sığortası şirkətinin - "Alfa Həyat"ın yaradılmasına lisenziya alınması üçün müraciət edib. Bu barədə bazar ertəsi Trend-ə ölkənin sığorta bazarındakı mənbə məlumat verib.
"Alfa Sığorta" şirkəti fevralın əvvəlində nazirliyə müraciət edib və qanunvericiliyin tələblərinə uyğun olaraq müəyyən prosesin başa çatmasından sonra cavab gözlənilir", - mənbə deyib.
Onun sözlərinə görə, şirkət nazirliyin yenidən yaradılan sığorta şirkətləri üzrə tələblərinə uyğun olaraq beş milyon manatlıq kapitalla yaradılır.
"Alfa Həyat" "Alfa Sığorta"nın yeganə səhmdarı olan "Texnikabank" tərəfindən yaradılacaq", - mənbə deyib.
Həyat sığortası şirkəti ilkin mərhələdə istehsalatda bədbəxt hadisələr nəticəsində əmək qabiliyyətinin itirilməsi hallarından icbari sığorta üzrə, gələcəkdə isə yığım sığortası üzrə xidmətlər göstərəcək.
"Texnikabank" ASC 2006-cı ilin dekabrında "Alfa Sığorta" ASC-nin səhmlərinin 100 faizini alıb. "Alfa Sığorta" 30 sığorta xidməti - sığortanın altı icbari və 24 könüllü növü üzrə lisensiyaya malikdir. Şirkətin nizamnamə kapitalı 4,6 milyon manat təşkil edir.
Hazırda ölkədə üç həyat sığortası şirkəti fəaliyyət göstərir - "Atəşgah Həyat", "Qala Həyat" və "Paşa Həyat".
Martın 28-nə olan rəsmi məzənnə 0,7932 AZN/USD təşkil edir.
