Azərbaycan, Bakı, 15 aprel /Trend, müxbir N.İsmayılova/
Aprelin 11-14-də Strasburqda Avropa Şurasının Pulların Yuyulmasına və Terrorçuluğun Maliyyələşdirilməsinə Qarşı Tədbirlərin Qiymətləndirilməsi üzrə Ekspertlər Komitəsinin (MONEYVAL) növbəti, 35-ci plenar iclası keçirilib. İclasda Azərbaycanın Qiymətli Kağızlar üzrə Dövlət Komitəsinin sədri Rüfət Aslanlının rəhbərlik etdiyi nümayəndə heyəti də iştirak edib. Trend-in məlumatına görə, bu barədə QKDK-nın cümə günü yaydığı məlumatda deyilir.
Plenar iclasın gündəliyinə Komitənin 2011-ci il üzrə Fəaliyyət Planının təsdiqlənməsi, üzv ölkələr tərəfindən pulların yuyulması və terrorçuluğun maliyyələşdirilməsinə qarşı mübarizə (PY/TMM) sahəsində həyata keçirilmiş təşəbbüslərə dair məlumatların verilməsi, Çexiya və Albaniyada aparılmış qiymətləndirmənin yekunlarına dair hesabatların, Bolqarıstan, Moldova, Xorvatiya və Bosniya və Hersoqovinada müvafiq sahədə görülmüş tədbirlərə dair tərəqqi hesabatlarının müzakirəsi və s. məsələlər daxil edilib. İclasın gedişində, həmçinin, MONEYVAL-ın gücələndirilmiş monitorinq rejimi altında olan 3 dövlətin AML/CFT sahəsində aşkar edilmiş boşluqların aradan qaldırılması istiqamətində həyata keçirdiyi tədbirlərin icra statusu da müzakirə edilib.
Ötən il Azərbaycan nümayəndə heyəti ilk dəfə olaraq Komitənin qərarı ilə Moldova üzrə məruzəçi təyin edilmişdi. Moldovanın tərəqqi hesabatı Azərbaycan nümayəndə heyəti tərəfindən təhlil edilərək plenar iclasda məruzə edilmişdi.
İlk dəfə olaraq Azərbaycan nümayəndə heyətinin üzvü (Azərbaycan Respublikası Mərkəzi Bankı yanında Maliyyə Monitorinqi Xidmətinin direktor müavini A.Salmanov) qiymətləndirici qismində üzv ölkələrdən birində (Latviya) keçiriləcək missiyanın tərkibinə daxil edilib.
Plenar iclas zamanı Azərbaycan nümayəndə heyəti bir sıra ikitərəfli faydalı görüşlər keçirib, pulların yuyulması və terrorçuluğun maliyyələşdirilməsinə qarşı mübarizə sahəsində aparılan işlər üzrə əməkdaşlığın yaradılması və genişləndirilməsinə dair fikir mübadiləsi aparılıb.
