Azərbaycan, Bakı, 18 aprel /Trend, müxbir N.İsmayılova/
Birinci rübün yekunlarına görə Azərbaycanda orta aylıq əməkhaqqının məbləği 339,6 manat təşkil edib ki, bu da ötən ilin müvafiq dövr göstəricisindən 11,7 faiz çoxdur. Bu barədə bazar ertəsi Trend-ə Dövlət Statistika Komitəsindən bildiriblər.
Ən yüksək əməkhaqqı mədən sənayesində, maliyyə və sığorta fəaliyyəti, informasiya və rabitə, elmi və texniki fəaliyyət sahələrində, eləcə də tikinti sektorunda işləyənlərdə qeydə alınıb.
Müəssisə və təşkilatların işçiləri yanvar-fevralda 2,7 milyon manat məbləğində sosial təyinatlı təzminatlar alıblar. Onların əsas alıcısı mədən sənayesı, enerji, qaz və suyun istehsalı və bölüşdürülməsi üzrə müəssisələr, maliyyə, sığorta, nəqliyyat, rabitə fəaliyyətinin işçiləri olublar.
Birinci rübdə adambaşına düşən nominal gəlir 721, 5 manat təşkil edib ki, bu da ötən ilin müvafiq dövr göstəricisini 15,3 faiz ötür.
Adambaşına düşən real pul gəliri 16,6 faiz artımla 663,4 manat təşkil edib.
Hesabat dövründə Azərbaycan əhalisinin nominal pul gəliri 6496,5 milyon manat olub ki, bu da ötən ilin göstəricisindən 16,8 faiz çoxdur. Bu dövrdə əhalinin real pul gəliri 18,1 faiz artımla 5 973 milyon manata çatıb.
Hesabat dövründə əhali mal alınması və xidmətlərə şəxsi gəlirlərinin 69,9 faizini, vergilər, digər məcburi ödənişlər və könüllü üzvlük haqlarının ödənilməsinə 8,1 faiz və kapitalın artırılmasına 20,6 faizini sərf edib.
Aprelin 18-nə olan rəsmi məzənnə 0,7917 AZN/USD təşkil edir.