Azərbaycan, Bakı, 12 may /Trend, müxbir A.Axundov/
Aprelin 1-nə olan vəziyyətə görə, pensiyaçıların sayı 1,286 milyon nəfər təşkil edib. Bu barədə cümə axşamı Trend-ə Dövlət Statistika Komitəsinin məlumatında deyilir.
Pensiyaçıların ümumi sayından 64 faizi yaşa görə, 25 faizi əlilliyə görə, 11 faizi isə ailə başçısının itirilməsinə görə pensiya alır.
Azərbaycanda pensiyanın orta məbləği ötən ilin müvafiq dövrü ilə müqayisədə 13 faiz artaraq 114,35 manat olub və orta aylıq əməkhaqqının 34 faizini təşkil edib.
Bu müddət ərzində 298,3 min nəfərə sosial müavinətlər təyin olunub. Yaşa görə müavinət alanların sayı 16,9 min nəfər, əlilliyə görə - 98,1 min nəfər, ailə başçısının itirilməsinə görə - 36,1 min nəfər, sağlamlıq imkanları məhdud olduğuna görə müavinət alan 18 yaşadək uşaqların sayı isə 58 min nəfər təşkil edib.
Əmək pensiyası almaq hüququ olmayan 56,5 min nəfərə kommunal, nəqliyyat və digər xidmətlərə görə güzəştlərin əvəzinə müavinət, yetim və valideyn himayəsindən məhrum olmuş uşaqların 802 nəfər qəyyumlarına, eləcə də 10,6 min ailəyə 21 min uşaq üçün aylıq müavinət verilib. Bu müavinətləri şəhid ailələrinin, müharibə əlillərinin, I və II qrup Çernobıl AES əlillərinin və müddətli hərbi xidmət qulluqçularının uşaqları alıblar.
Əmək xəsarəti və ya peşə xəstəliyi nəticəsində 539 zərərçəkənə kompensasiya verilib.
Bundan əlavə, 33,8 min nəfərə, o cümlədən 28,8 min nəfərə uşağın doğulmasına görə, 3,9 min nəfərə radiasiya qəzası nəticəsində əlil olmuş şəxslərin müalicəsi üçün, 517 nəfərə penitensiar xidmətdən azad olanlara və həyatını itirmiş 532 nəfərin dəfni üçün birdəfəlik müavinət verilib.
2011-ci ilin birinci rübündə Azərbaycan Respublikası qarşısında xüsusi xidmətlər göstərmiş 34,2 min nəfər aylıq təqaüd alıb.
Cari il aprel ayının 1-nə olan vəziyyətə görə, ölkədə 121,7 min ailənin 542,2 min nəfər üzvü ünvanlı dövlət sosial yardımı alıb və hər bir nəfərə əlavə olaraq 24,11 manat ödənilib.
Mayın 12-nə olan rəsmi məzənnə 0,7908 AZN/USD təşkil edir.
