Azərbaycan, Bakı, 13 may /Trend, müxbir N.İsmayılova/
Mayın 27-də Bakıda Mərkəzi Avrasiya Bank Federasiyası təsisçilərinin ilk yığıncağı keçiirləcək. Yığıncaq çərçivəsində federasiyanın rəyasət heyəti seçiləcək. Bu barədə cümə günü Trend-ə Azərbaycan Banklar Assosiasiyasından deyiblər.
"Təsisçilərin yığıncağı çərçivəsində rəyasət heyətinin, auditor komitəsinin, federasiyanın icra aparatının seçilməsi, büdcənin təsdiq edilməsi, eləcə də Bakı Bəyannaməsinin imzalanması gözlənilir. İclasda Moldova Banklar Assosiasiyasının federasiya üzvlüyünə qəbul edilməsi məsələsinə də baxılacaq", - assosiasiyadan bildiriblər.
Yığıncaq zamanı maliyyə-bank sahəsində regional əməkdaşlığın gücləndirilməsi məsələləri, eləcə də federasiya üzvlərinin yaxın bir neçə il ərzində əməkdaşlıq istiqamətləri müzakirə olunacaq.
Azərbaycan Ədliyyə Nazirliyi Mərkəzi Avrasiya Bank Federasiyasını 2010-cu ilin avqustunda qeydiyyata alıb. Azərbaycan, Gürcüstan, Qırğızıstan və Ukraynanın bank assosiasiyaları bu federasiyanın təsisçiləridir. Belarus, Tacikistan və Türkiyə federasiya üzvüdür.
Federasiyanın mənzil-qərargahı Bakıda yerləşir. Federasiyaya Mərkəzi Avropa, Qafqaz və Mərkəzi Asiya ölkələrinin bank assosiasiyaları daxil olacaq. Onlar bank və pul-kredit sistemləri siyasətini birlikdə hazırlayacaqlar.
