Azərbaycan, Bakı, 13 may /Trend, müxbir A.Axundov/
Aprel ayı ərzində Azərbaycanın pensiya sisteminin uzunmüddətli inkişaf modelini hazırlayacaq şirkət müəyyən ediləcək. Trend-in məlumatına görə, bu barədə cümə günü jurnalistlərə Dövlət Sosial Müdafiə Fondunun (DSMF) sədri Səlim Müslümov deyib.
"Dünya Bankı ilə birgə Azərbaycanda sosial müdafiənin inkişafı üzrə layihə çərçivəsində tender başa çatıb və bu gün tender təklifləri açılacaq. Tenderdə bu sahədə 5 aparıcı şirkət iştirak edir və ay ərzində xüsusi qiymətləndirmə komissiyası ölkənin pensiya sığorta sisteminin gələcək inkişaf modelinin hazırlanması üçün namizədi seçəcək", - Müslümov bildirib.
Onun sözlərinə görə, bu layihə Dünya Bankının krediti hesabına maliyyələşdirilir və bütün aktuar hesablamaların aparılmasını və Azərbaycanın pensiya sığorta sisteminin 2015-ci ildən sonra əsas inkişaf parametrlərini nəzərdə tutur.
Müslümovun szölərinə görə, bu sahədə aparıcı mütəxəssislərdən biri - Dünya Bankının nümayəndəsi xanım Anita Şvars artıq bir neçə gündür Bakıdadır. Onunla bir neçə görüş keçirilib. Onlardan biri cümə günü baş tutub. Görüşdə Azərbaycanda pensiya sığorta sisteminin inkişaf perspektivlərinin təqdimatı keçirilib.
"Azərbaycanda sosial müdafiənin inkişafı" layihəsi üzrə 54,6 milyon dollar dəyərində kredit razılaşması DB və Azərbaycan hökuməti arasında 2008-ci ilin noyabrında imzalanıb. Layihənin maliyyələşməsi üçün DB Beynəlxalq İnkişaf Assosiasiyasının şərtləri ilə (10 illik güzəşt dövrü, illik 0,75 faizlə 35 il müddətinə) 26,7 milyon dollar verəcək.
Layihə dörd komponentdən ibarətdir: əmək bazarı sisteminin tam müasirləşməsi, o cümlədən əmək qanunvericiliyinin, əməyin mühafizəsi sisteminin, məşğulluq xidməti işinin təkmilləşdirilməsi; sosial təminat sistemi siyasətinin formalaşdırılması; pensiya sisteminin müasirləşdirilməsi və layihənin idarə olunması.
Layihə çərçivəsində peşəkar təlim sisteminin tam institusional inkişafı və müasirləşdirilməsi, Avropa təcrübəsi əsasında peşəkar təsnifatçıların hazırlanması, eləcə də nazirlik yanında peşəkar təlim mərkəzinin yaradılması nəzərdə tutulur. Bundan başqa, layihənin başlıca məqsədi ölkədə pensiya sisteminin inkişafı, sosial müdafiə orqanlarının gücləndirilməsi, sosial xidmətlərin yaxşılaşdırılması və ünvanlı sosial yardımın təkmilləşdirilməsi, kadr potensialının möhkəmləndirilməsidir.
Layihə 2008-ci ildən 2013-cü ilədək hesablanıb.
