Azərbaycan, Bakı, 17 may /Trend, müxbir İ.Xəlilova/
Azərbaycan hökuməti İslam İnkişaf Bankı (İİB) ilə 2011-2013-cü illər üzrə 1,4 milyard dollar həcmində yeni əməkdaşlıq proqramı imzalayıb. Bu barədə çərşənbə axşamı Trend-ə bankın Bakı ofisindən məlumat verilib. Yeni proqrama kənd təsərrüfatı, süni suvarma, yol tikintisi, su təchizatının yaxşılaşdırılması və kanalizasiya sahəsində təxminən 11 layihə daxildir.
"Proqram çərçivəsində aqrar və süni suvarma sahələri üzrə layihələr üçün güzəştli maliyyələşdirmənin təqdim edilmə imkanları istisna edilmir", - bankdan bildirilib.
2011-cu ildə dörd layihənin həyata keçirilməsi nəzərdə tutulur ki, bank bunun üçün təxminən 450 milyon dollar ayırmağı planlaşdırır. Layihələrdən biri mayın əvvəlində İİB Direktorlar Şurasında təsdiq olunub. Bu layihə Naxçıvanda daşqınların qarşısının alınması, suvarılan torpaqların modernləşdirilməsi və genişləndirilməsi fəaliyyətini nəzərdə tutur. Bank layihənin həyata keçirilməsi üçün 64,83 milyon dollar ayırıb. Layihənin ümumi dəyəri təxminən 80 milyon dollar təşkil edir. İİB bu layihə üzrə maliyyələşmənin bir hissəsini (9,5 milyon dollar) güzəştli şərtlərlə ayıracaq.
Cari il üzrə proqrama su təchizatı sistemləri və kanalizasiya üzrə iki layihə daxil edilib. Onların hər biri üçün təxminən 110 milyon dollar ayrılması nəzərdə tutulub. Süni suvarma üzrə kreditin təsdiqlənəcəyi də ehtimal olunur.
Ümumilikdə proqram çərçivəsində süni suvarma layihəsinin reallaşdırılması nəzərdə tutulub. Mil-Qarabağ su kollektorunun yenidən qurulması layihəsi üzrə texniki-iqtisadi əsaslandırmanın (TİƏ) hazırlanması ilə bağlı işlər davam edir. İİB TİƏ-nin hazırlanmasına 347 min dollar məbləğində qrant ayırıb. İkinci layihə Şəmkir maşın kanalının tikintisi ilə bağlıdır, onun TİƏ-nin hazırlanması davam edir.
Azərbaycan-İİB əməkdaşlığı təcrübəsində ilk dəfə olaraq proqramın dəyəri bir milyard dolları ötür.
9 layihədən ibarət bundan əvvəlki proqramın dəyəri 460 milyon dollar təşkil edirdi.
Azərbaycan 1992-ci ildən İİB-yə üzvdür və hazırda bankın ölkə üzrə portfeli 700 milyon dollara çatır. Bankın kapitalında ölkənin iştirak payı 0,13 faiz təşkil edir.
İslam İnkişaf Bankı 1975-ci ildə təsis edilib. Yarandığı vaxtdan bankın kapitalı on beş dəfə artaraq, iki milyard İslam dinarından 30 milyard İslam dinarına (İslam dinarı İİB-nin hesab vahididir və Beynəlxalq Valyuta Fondunun bir xüsusi kredit hüququna ekvivalentdir) çatıb.
