Azərbaycan, Bakı, 21 may /Trend, müxbir N.İsmayılova/
Azərbaycanın Risk Peşəkarları Assosiasiyası (ARPA) və Azərbaycan Bank Tədris Mərkəzi (ABTM) ölkədə Risk-Menecment Peşəkarları Qlobal Assosiasiysının (GARP) iki sertifikatlaşdırılmış mərkəzinin yaradılması üzrə işlər həyata keçirir. Bu barədə şənbə günü Trend-ə assosiasiyanın rəhbəri Rüfət Mahmud məlumat verib.
"Bu məqsədlə ARPA və Azərbaycan Bank Tədris Mərkəzi öz mütəxəssislərinə GARP standartları üzrə təhsil verəcək. Bu layihə Beynəlxalq Maliyyə Korporasiyasının (IFC) hesabına maliyyələşdiriləcək", - Mahmud deyib.
Onun sözlərinə görə, ARPA-nın yaradacağı mərkəzlər risk-menecment sahəsində mütəxəssislərin onlayn rejimdə Azərbaycan dilində beynəlxalq standartlar üzrə sertifikasiyasını aparmağa imkan verəcək. İştirakçıya testi keçməsi barədə GARP sertifikatı veriləcək.
GARP risklərin idarə olunması üzrə təhsil və kursların keçirilməsi, sertifikatlaşdırılması və şirkətlərdə risk mədəniyyətinin irəliləməsi ilə məşğul olan strukturdur. Təşkilatın dünyanın 40 ölkəsində nümayəndəlikləri var.
ARPA-nın yaradılmasında məqsəd ölkənin maliyyə sektorunda risklərin azaldılmasına kömək etməkdir. Assosiasiya ölkənin Mərkəzi Bankı, GARP və IFC ilə əməkdaşlıq edir.
