Azərbaycan, Bakı, 23 may /Trend, müxbir N.İsmayılova/
Azərbaycanda dövlət borcunun idarə edilməsi üzrə ortamüddətli və uzunmüddətli strategiya hazırlanmalıdır. Bu barədə bazar ertəsi Hesablama Palatasının sədri Heydər Əsədov Parlamentin İqtisadi siyasət komitəsinin iclasında "Azərbaycan Respublikasının 2011-ci il dövlət büdcəsi haqqında" Azərbaycan Respublikasının Qanununda dəyişikliklər edilməsi barədə" qanun layihəsinin müzakirəsi zamanı deyib.
"Ölkənin indiki dövlət borcunun həcminin kritiq vəziyyətdən uzaq olması o demək deyil ki, biz borcun səviyyəsini artırmı davam etdirməliyik. Hesab edirik ki, xarici borcun idarə edilməsi üzrə ortamüddətli və uzunmüddətli strategiya hazırlanmalıdır ki, onun əsasında xarici borcun səmərəli siyasətini aparmaq mümkün olsun", - Əsədov bildirib.
Onun sözlərinə görə, Dünya Bankının "Global Development Finance 2011" məruzəsi Azərbaycanın xarici dövlət borcunun səviyyəsi üzrə mövqeyini təhlil edərək, qənaətbəxş qiymətləndirib.
"Ötən il dövlət büdcəsinin defisiti xarici bazarlarda avrobondların yerləşdirilməsindən imtina edilməsi ilə əlaqədar planlaşdırılan səviyyədən aşağı olub və müsbət haldır ki, defisiti daxili broclar hesabına ödəmək mümkün olub", - o bildirib.
Yanvarın 1-nə olan vəziyyətə görə, Azərbaycanın xarici dövlət borcu 3857,3 milyon dollara çatıb. Bu, ÜDM-in 7,42 faizini təşkil edir. Bu barədə bazar ertəsi Maliyyə Nazirliyindən bildirilib.
2010-cu il ərzində ölkənin xarici dövlət borcu 12,7 faiz artıb.