Azərbaycan, Bakı, 31 may /Trend, müxbirlər M.Əliyev, A.Axundov/
Azərbaycanda sahibkarlıq fəaliyyəti ilə məşğul olan fiziki şəxslər və torpaq sahibləri Dövlət Sosial Müdafiə Fonduna (DSMF) sosial-sığorta haqlarının ödənilməsi haqqında ödəniş bəyannaməsinin təqdim edilməsindən azad edilə bilərlər. Bu barədə çərşənbə axşamı jurnalistlərə Dövlət Sosial Müdafiə Fondunun sədri Səlim Müslümov deyib.
Onun sözlərinə görə, bununla əlaqədar mövcud qanunvericiliyə dəyişikliklərin edilməsi planlaşdırılır.
"Bu kateqoriyalı şəxslər tərəfindən ödənilən icbari dövlət sosial sığortası üzrə köçürmələr stabil məbləğlə ifadə edilir. Bu məbləğ onların hesabında görünür və bizdə müvafiq uçot aparılır. Bununla bağlı bəyannamənin təqdim edilməsinə ehtiyac olmur", - Müslümov qeyd edib.
Müslümovun sözlərinə görə, hazırda ödənilmiş sosial-sığorta haqları və pensiya təminatı üzrə hesabatların təqdim edilməsi prosesinin avtomatlaşdırılması sisteminə keçidə hazırlıq gedir.
"Hesabatların elektron şəkildə təqdim edilməsinin təşkili üzrə işlərin yaxın aylarda başa çatdırılması gözlənilir", - Müslümov qeyd edib.
Hazırda işçinin icbari sosial sığortası üçün köçürmələr məlum olduğu kimi, iki mənbədən formalaşdırılır: işəgötürənlər əməkhaqqı fondundan 22 faiz məbləğində sosial sığorta üçün köçürmələr edirlər, işçinin əməkhaqqından isə 3 faiz tutulur.
2008-ci ildən hüquqi şəxs yaratmadan sahibkarlıq fəaliyyəti ilə məşğul olan şəxslər üçün sosial sığorta üzrə köçürmələrin faiz dərcəsi azaldılıb və torpaq sahibləri üçün vahid faiz dərəcəsi tətbiq edilib. Qüvvədə olan "Sosial sığorta haqqında" qanuna görə, ticarət ilə məşğul olan fərdi sahibkarlar hər ay icbari sosial sığorta üçün minimal əməkhaqqının 70 faizinin 50 faizini, fəaliyyətin digər sahələrində 20 faizini (40 faiz) ödəyirlər. Hazırda minimal əməkhaqqı 85 manatdır.
Ailəvi kənd təsərrüfatı işçiləri üçün minimal əməkhaqqının 6 faiz dərəcəsi tətbiq edilib.
Mayın 31-nə olan rəsmi məzənnə 0,7894 AZN/USD təşkil edir.
