Azərbaycan, Bakı, 31 may /Trend/
GUAM-ın nəqliyyat üzrə işçi qrupu "GUAM-ın nəqliyyat dəhlizinin inkişaf konsepsiyası"nın razılaşdırılmış variantını təşkilata üzv dövlətlərdə nəqliyyatın inkişafına məsul rəhbərlər səviyyəsində qəbuluna tövsiyə edib. Trend-in məlumatına görə, bu barədə GUAM-ın çərşənbə axşamı yaydığı məlumatda deyilir.
IRU-nun (Beynəlxalq Avtomobil Nəqliyyatı İttıfaqı) Avrasiya regionunda nümayəndələrinin və GUAM Katibliyinin iştirak etdiyi işçi qrupunun 7-ci iclası mayın 30-31-də Kiyevdə Azərbaycan tərəfinin sədrliyi ilə keçib.
Müzakirələrin yekunları üzrə iclas iştirakçıları IRU-nun "Model şose təşəbbüsü" layihəsinə dair məlumatı nəzərə almağı tövsiyə etmək və onun həyata keçirilməsi məqsədilə müzakirəsini davam etdirmək qərarına gəliblər.
İclas zamanı iştirakçılar işçi qrupunun 6-cı iclasının protokolunun icrası ilə bağlı fikir mübadiləsi aparıblar, Ukrayna tərəfinin təklifləri nəzərə alınmaqla "GUAM-ın nəqliyyat dəhlizinin inkişaf konsepsiyası" layihəsini müzakirə ediblər.
İclasın yekunları üzrə protokol imzalanıb.
İştirakçılar işçi qrupunun növbəti iclasını 2011-ci ilin ikinci yarısında keçirmək barədə razılığa gəliblər. İclasın dəqiq tarixi və keçirilmə yeri diplomatik kanallarla razılaşdırılacaq.