Azərbaycan, Bakı, 3 iyun /Trend, müxbir A.Axundov/
Azərbaycanda kənd təsərrüfatı sığortasının inkişaf etməməsinin səbəblərindən biri sığorta şirkətlərinin bu sahədə təcrübəsinin və müvafiq kadr potensialının olmamasıdır. Bu barədə cümə günü Trend-ə Azərbaycan Sığortaçılar Assosiasiyasının icraçı direktoru Azər Əliyev bildirib.
"Sığorta şirkətlərinin passivliyinin səbəbi bu sahədə iş təcrübəsinin və kadr potensialının olmamasından irəli gəlir. Sığortanın bu növü sadə deyil və xüsusilə itkilərin nizamlanması məsələsində təcrübəli mütəxəssislərin olmasını tələb edir", - Əliyev deyib.
Onun sözlərinə görə, bu səbəbdən bir çox sığortaçılar hələlik bu bazara çıxmaqla bağlı qərar qəbul edə bilmirlər, halbuki burada böyük potensial var.
"Kənd təsərrüfatının iqtisadiyyatımızın aparıcı sahələrdən biri olması faktını nəzərə alsaq, onda deyə bilərik ki, fəaliyyətin bu növünün sığortası perspektivli istiqamətdir", - o deyib.
Bir müddət əvvəl Maliyyə Nazirliyi yanında Dövlət Sığorta Nəzarəti Xirmətinin rəhbəri Namiq Xəlilov bildirib ki, Azərbaycan kənd təsərrüfatı sahəsində sığortanın stimullaşdırılması üçün lazım olan qanunvericiliyə malikdir.
"Hər il dövlət büdcəsindən aqrar sektorda risklərin sığortalanması üçün müəyyən həcmdə vəsait ayrılır, lakin yerli fermerlər bu sahəyə o qədər də böyük maraq göstərmirlər. Bununla əlaqədar dövlət büdcəsindən ayrılan vəsaitlərin ümumi həcminin yalnız 10 faizə yaxınından istifadə olunur", - Xəlilov bildirib.
Onun sözlərinə görə, Kənd Təsərrüfatı və Maliyyə nazikrliklərinin nümayəndələrinin iştirakı ilə bu sahədəki beynəlxalq təcrübəni öyrənmək və müvafiq təkliflərin hazırlanması məqsədilə birgə işçi qrup yaradılıb.
Bundan əvvəl "Azərsığorta" QSC kənd təsərrüfatı sığortası üzrə əlavə vəsaitlərin verilməsi haqda ölkə hökumətinə təklif təqdim edib. Şirkətin təklifi kənd təsərrüfatı sahəsində sığorta müqaviləsinin 100 faiz ödənilməsini nəzərdə tutur, halbuki bu sahədə sığorta ödənişi 50 faiz təşkil edir. Təklifin hazırlanmasına səbəb fermerlərin əksəriyyətini öz əmlakını sığorta etməməsi ilə əlaqədardır. Onlar bunu əlavə vəsaitin olmaması ilə izah edirlər.
Azərbaycanda "Kənd təsərrüfatına yardım və inkişaf haqqında" Qanuna yayda təsdiqlənən əlavələrə görə, kənd təsərrüfatı sığortasında sığorta haqlarının maliyyələşdirilməsinin dövlət payı 25 faizdən 50 faizə qaldırılıb. Dövlət büdcəsindən sığorta edilən kənd təsərrüfatı bitkilərinin siyahısına buğda, arpa, qarğıdalı, günəbaxan, kartof, şəkər çuğunduru, tərəvəz (göyərti istisna olmaqla) daxil edilib.
Kənd təsərrüfatı sığortası üzrə orta tarif ildə 1500 manata yaxındır.Torpağın bir hektarından orta gəlir ildə 25 min manata bərabərdir.
İyunun 3- nə rəsmi məzənnə 0, 78 93 AZN/USD təşkil edir.
