Azərbaycan, Bakı, 6 iyun /Trend, müxbir A.Axundov/
2011-ci ildə Azərbaycanda 1,335 milyon hektar ərazidə kənd təsərrüfatı məhsullarının suvarılması planlaşdırılır. Trend-in məlumatına görə, bu barədə Azərbaycanın "Meliorasiya və Su Təsərrüfatı" ASC-nin sədri Əhməd Əhmədzadənin rəsmi mətbuatda dərc edilən məqaləsində deyilir.
"İndi biz taxıl bitkilərinin suvarılmasını başa çatdırırıq və digər əkinlərin kütləvi suvarılmasına başlamışıq. 2010-cu ildə mürəkkəb təbii-iqlimi şəraitə baxmayaraq, 1,33 milyon hektar ərazidə kənd təsərrüfatı məhsulları lazımi sayda su ilə təmin edilib, ərazilər orta hesabla gündə 3 dəfə suvarılıb", - Əhmədzadə qeyd edib.
Onun sözlərinə görə, 2010-cu ildə bu sahədə tikinti, yenidənqurma və bərpa üzrə işlər 2009-cu illə müqayisədə iki dəfə çox görülüb.
"Azərbaycan Dövlət Neft Fondu tərəfindən ayrılan vəsaitlər Samur-Abşeron suvarma sisteminin yenidən qurulması layihəsi çərçivəsində Taxtakörpü su anbarı və SES ilə birlikdə və Taxtakörpü-Ceyranbatan kanalı üzrə planlaşdırılan işləri ötüb. Bundan başqa, 10,7 kilometrlik Vəlvələçay-Taxtakörpü kanalının birinci mərhələsinin beynəlxalq maliyyə institutlarının hesabına tikintisi başa çatıb, habelə onun ikinci mərhələsi üzrə ARDNF-nin vəsaitləri hesabına işlər davam etdirilib", - Əhmədzadə bildirib.
Onun sözlərinə görə, ümumilikdə 2010-cu ildə 61,6 kilometrlik irriqasiya kanallarının və Kürdəmir, Ağstafa, Hacıqabul, Goranboy, Qazax, Qax, Ağdam, Beyləqan, Neftçala, Bərdə, Tərtər, Şəmkir, Saatlı, Biləsuvar, Yevlax, Füzuli, Ağcabədi və b. rayonlarda 179,9 kilometrlik kollektor-drenaj şəbəkələrinin tikintisi, yenidən qurulması və bərpası üzrə işlər görülüb.
"Bunun nəticəsində 11 197 hektarlıq suvarılan ərazilərin meliorativ vəziyyəti və 18 519 hektar yeni suvarılan ərazilərin su təchizatı yaxşılaşdırılıb. 1100 hektar yeni suvarılan ərazi istismara verilib, 2950 hektarlıq ərazidə su təchizatının yaxşılaşdırılması üçün 114 subartezian quyusu qazılıb, respublikanın çaylarında sel və daşqınların yaranması təhlükəsi ilə mübarizə üçün 22 830 metr sahilbərkitmə işləri görülüb", - Əhmədzadə qeyd edib.
2010-cu ildə Cəlilabadda Göytəpə (tutumu 3,7 milyon kubmetr) su anbarının tikintisi başa çatdırılıb, Şabran rayonu ərazisində Taxtakörpü (tutumu 268 milyon kubmetr), Şəmkir rayonu ərazisində Şəmkirçay (tutumu 160 milyon kubmetr), Tovuz rayonu ərazisində Tovuzçay su anbarlarında tikinti işləri, eləcə də Hacıqabul və Şamaxı rayonlarında su anbarlarında təmir-bərpa işləri davam etdirilib.
"Dünya Bankının krediti hesabına ölkənin 16 rayonunda (Şabran, Siyəzən, Ağsu, İsmayıllı, Lənkəran, Masallı, Astara, Cəlilabad, Lerik, Yardımlı, İmişli, Kürdəmir, Ucar, Zərdab, Daşkəsən, Gədəbəy) içməli su təminatı üzrə infrastrukturun bərpası və tikintisinə dair işlərin həyata keçirilməsi üçün TİƏ-nin hazırlanmasına başlanılıb. Şabran, Siyəzən, Ağsu və İsmayıllıda bu işlər artıq başa çatıb. Şabran və Siyəzəndə su təchizatı və kanalizasiya sistemlərinin tikintisinə, eləcə də çirkab suların təmizlənməsi üzrə qurğuların quraşdırılmasına başlanılıb", - Əhmədzadə vurğulayıb.
Hazırda "Meliorasiya və Su Təsərrüfatı" ASC tutumu 21,5 milyard kubmetr olan 140 su anbarı, 19 su qovşağı, 51,8 min kilometr irriqasiya kanalı, 31,7 min kollektor-drenaj şəbəkəsi, 921 nasos, 118 min müxtəlif hidrotexniki qurğu, 7279 subartezian quyusu, uzunluğu 2073 kilometr olan sel və daşqınların qarşısının alınması üzrə müdafiə torpaq bəndləri və dövlət əhəmiyyətli su təsərrüfatının digər sistem və qurğularını işlədir.