Azərbaycan, Bakı, 14 iyun /Trend, müxbir A.Axundov/
2011-ci ilin yanvar-may aylarında Azərbaycanın sığorta şirkətlərinin istehsalatda peşə xəstəlikləri və bədbəxt hadisələr nəticəsində əmək qabiliyyətinin itirilməsinin icbari sığortası üzrə sığorta haqları 11,941 milyon manat təşkil edib. Bu, yanvar-aprelin göstəricisindən 37,12 faiz çoxdur. Bu barədə ilin ilk beş ayı ərzində sığortaçıların fəaliyyətlərinin yekunları üzrə Maliyyə Nazirliyinin hesabatında deyilir.
Mayda "Atəşgah Həyat" sığorta şirkəti tərəfindən ölkədə sığortanın bu növü üzrə ilk və hələ ki yeganə ödəniş edilib.
Yol nəqliyyat hadisəsi nəticəsində Bakının qida sənayesi müəssisələrinin bir əməkdaşı (sürücü) həlak olub. Birdəfəlik ödənişin məbləği bağlanmış müqavilənin sığorta məbləğinə əsasən, 12 590 manat təşkil edib.
Azərbaycanda hazırda həyat sığortası üzrə cəmi 3 şirkət fəaliyyət göstərir. Onlar istehsalatda peşə xəstəlikləri və bədbəxt hadisələr nəticəsində əmək qabiliyyətinin itrilməsinin icbari sığortası üzrə xidmətlərin göstərilməsi üçün lisenziyaya malikdirlər. Bunlar "Atəşgah Həyat, "Qala Həyat" və "Paşa Həyat" şirkətləridir.
Azərbaycanda cəmi 28 sığorta və bir təkrar sığorta şirkəti fəaliyyət göstərir.
İyunun 14-nə olan rəsmi məzənnə 0,7882 AZN/USD təşkil edir.
