Azərbaycan, Bakı, 22 iyun /Trend, müxbir A.Axundov/
Azərbaycanın Mədəniyyət və Turizm Nazirliyi ölkə regionlarındakı mehmanxanaların və turizm obyektlərinin monitorinqinə başlayıb. Bu barədə çərşənbə günü Trend-ə nazirliyin Daxili turizmin inkişafı sektorunun baş məsləhətçisi Vüqar Şixəmmədov bildirib.
"Monitorinqlər iki gün əvvəl başlayıb və indi Azərbaycanın şimal-qərb hissəsində keçirilir. Yaxın günlərdə ölkənin şimalında və qərbində turizm obyektlərinin monitorinqinə başlanacaq", - Şixəmmədov deyib.
Onun sözlərinə görə, monitorinq komissiyası nazirlik tərəfindən ölkənin regionlarında turizm yay mövsümündə yerli və xarici turistlərə göstərilən xidmətlərin keyfiyyət səviyyəsini, xidmətlərin qiymət və keyfiyyət nisbətini və digər mövcud problemləri öyrənmək üçün yaradılıb.
"İlkin məlumatlara görə, bu mövsüm regionlarda mehmanxanalar tərəfindən göstərilən xidmətlərin ötən ilin analoji dövrü ilə müqayisədə 10-15 faiz ucuzlaşdığı müşahidə olunur", - Şıxməmmədov deyib.
Onun sözlərinə görə, proses yenicə başlayıb, ona görə də aşkar olunan pozuntularla bağlı məlumatlar açıqlanması üçün hələlik hazır deyil.
Azərbaycanda 499 mehmanxana və mehmanxana tipli obyekt fəaliyyət göstərir.
