Azərbaycan, Bakı, 24 iyun /Trend, müxbir A.Axundov/
Azərbaycanda yaradılması planlaşdırılan icbari sığorta bürosuna sığorta şirkətlərinin ödənişləri təkcə təqvim ödənişləri ilə məhdudlaşmayacaq. Bu barədə cümə günü Trend-ə Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov bildirib.
"Müflisləşmə zamanı hər hansı şirkətin büroda toplanacaq vəsaitləri onun sığorta müqaviləsi üzrə öhdəliklərinin yerinə yetirilməsinə kifayət etməyəcək, o zaman sığorta şirkətləri tərəfindən əlavə ödənişlərin edilməsi mümkündür", - Xəlilov deyib.
Onun sözlərinə görə, büronun yaradılması işlərinə cümə günü üçüncü oxunuşda qəbul edilən "Sığortanın icbari növləri haqqında" qanunun qüvvəyə minməsindən sonra başlanacaq.
"icbari sığorta bürosu özündə sığorta şirkətləri birliyini ehtiva edəcək və sığortanın bu növləri ilə məşğul olacaq və DSNX və Sığortaçılar Assosiasiyasından asılı olmayan ayrıca struktur olacaq", - Xəlilov bildirib.
Onun sözlərinə görə, büronun malik olduğu vəsaitlərinin investisiyalaşdırılması siyasəti olacaq ki, bu da bu investisiyaların qorunması və müəyyən gəlirliliyini təmin edəcək.
"Əgər gəlirlər xərcləri üstələyərsə, bütün bu vəsaitlər toplanacaq, idarə olunacaq, çoxalacaq və s. Şübhəsiz ki, bu pullar sadəcə olaraq yatıb qalmamalıdır, onlar gəlir gətirməlidir. Büroda təsisçilərin toplantısı olacaq, qəyyumlar şurası olacaq və orada onun vəsaitlərinin yerləşdirilməsində hansı alətlərdən istifadə edilməsi qərara alınacaq", - Xəlilov əlavə edib.
DSNX rəhbərinin sözlərinə görə, sığortanın icbari növlərinin inkişafı ilə sığorta şirkətlərinin üzərilərinə götürdükləri öhdəliklər də artacaq.
"Ona görə də fond nə qədər böyük olarsa, gələcəkdə gözlənilməz hallarda sığortaçıların hüquqlarının qorunması üçün daha böyük imkanlar olacaq", - Xəlilov bildirib.
Onun sözlərinə görə, bu fondun vəsaitləri paylanmayacaq və iştirakçılara qaytarılmayacaq.
Bir müddət əvvəl maliyyə nazirinin müavini Azər Bayramovun dediyi kimi, ilkin qanun layihəsində büronun yalnız nəqliyyat vasitələri sahiblərinin mülki məsuliyyətinin icbari sığortası ilə bağlı yaradılması nəzərdə tutulmuşdu, lakin qanun layihəsinin müzakirələrində səsləndirilən təkliflər nəzərə alınmaqla, o, bu qanunun əhatə etdiyi sığortanın bütün icbari növlərinə şamil ediləcək.
Ölkədə icbari sığortanın orta hesabla 9 növü fəaliyyət göstərir. Qanun layihəsi icbari sığortanın dörd növünü - daşınmaz əmlakın, nəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.
Azərbaycan Sığortaçılar Assosiasiyasının icraçı direktoru Azər Əliyevin Trend-ə bildiridiyinə görə, ilkin mərhələdə büronun əsas fəaliyyəti sığortanın digər növləri ilə müqayisədə böyük itkilər nəzərə alınmaqla, nəqliyyat vasitələri sahiblərinin mülki məsuliyyəti üzrə icbari sığortanın payına düşəcək. Əliyev bildirib ki, vaxt keçdikcə bu itkilər azalacaq.
Qanuna görə, sığorta şirkətləri tərəfindən büroya aylıq ödənişlər icbari sığorta müqavilələri üzrə sığorta haqlarının beş faizi məbləğində həyata keçirilməlidir.
İcbari sığorta növləri üzrə icazəyə malik bütün sığortaçılar büronun üzvü olmalı və zəmanət depozitini daxil etməlidirlər.
Bundan əlavə, elektron informasiya sistemlərinin yaradılması və onun başqa informasiya sistemləri ilə əlaqələndirilməsi nəzərdə tutulur.
