Azərbaycan, Bakı, 1 iyul /Trend, müxbirlər İ.Xəlilova, E.İsmayılov/
Azərbaycanda nəqliyyatın intellektual idarə olunması sistemi layihəsinin tətbiqi prosesi 3 mərhələdə həyata keçiriləcək. By barədə cümə günü Trend-ə Azərbaycan Nəqliyyat Nazirliyinin nəqliyyat siyasəti və iqtisadiyyat şöbəsinin müdiri Sədrəddin Məmmədov deyib.
"Nəqliyyatın intellektual idarə olunması sistemi layihəsi onun fəaliyyət zonasının genişləndirilməsi imkanı ilə hazırlanır. Birinci mərhələdə intellektual sistem Bakı şəhərini, ikinci mərhələdə Abşeron yarımadasını, sonuncu mərhələ bütün respublikanı əhatə edəcək. Bütün 3 mərhələ həyata keçirildikdən sonra sistem Bakıdakı mərkəzdən idarə olunacaq", - Məmmədov bildirib.
Sistem qabaqcıl texnologiyalardan istifadə etməklə hazırlanır.
Onun sözlərinə görə, intellektual sistemin birinci mərhələsinin oktyabrda istismara verilməsi planlaşdırılır.
"Müddətin bir qədər yubanması layihəyə edilən dəyişikliklərlə bağlıdır, - Məmmədov əlavə edib. - Bunun nəticəsində layihənin qiyməti 19 milyon dollar artıb".
Layihənin ilkin dəyəri 77 milyon dollar idi.
Layihənin bahalaşması Nazirlər Kabinetinin "Terror aktlarının qarşısını almaq üçün bir sıra tədbirlərin görülməsi haqqında" qərarına uyğun olaraq sistemin əlavə funksiyalarının işlənib hazırlanması ilə əlaqədardır.
Dəyişikliklərin edilməsi nəticəsində videoaxınların və onların qeydiyyatının artırılması təmin edilib.
Bundan başqa, informasiya terminallarının sayı da 664 ədədə çatdırılıb. İşlərin genişləndirilməsi çərçivəsində Bakının küçələrində quraşdırılması nəzərdə tutulan informasiya tablolarının sayı 20-dən 48 ədədə çatdırılıb.
Nazirlik nümayəndəsinin bir müddət əvvəl dediyinə görə, Bakı şəhərində nəqliyyatın intellektual idarə olunması sisteminin dəyəri 77 milyon dollardan 100 milyon dollaradək artıb.
Sistem çərçivəsində avtobus dayanacaqları üçün 639-a yaxın, taksilər üçün 140-a yaxın meydançanın yaradılması planlaşdırılır. Bu işlər yol polisi və intellektual sistemin hazırlanması prosesində iştirak edən Cənubi Koreya mütəxəssisləri ilə birgə aparılır.
İntellektual sistem 150-yə yaxın yeni elektron tipli işıqforun quraşdırılmasını nəzərdə tutur.
