Azərbaycan, Bakı, 4 iyul /Trend, müxbir İ.Xəlilova/
Azərbaycanda məişət tullantılarının kompleks idarə edilməsi layihəsinin hazırlığı prosesinin icmalı üçün bazar ertəsi Bakıya Frank Van Verdenin başçılığı ilə Dünya Bankının missiyası gəlir. Bu barədə bazar ertəsi bankın Bakı nümayəndəliyindən bildirilib. Bankın missiyası işini iyulun 8-də başa vuracaq.
Hazırda Türkiyənin "Ecodenge" şirkəti Bakı şəhərində bərk məişət tullantılarının idarəçiliyi üzrə 20 illik inkişaf strategiyasının və "Təmiz Şəhər" ASC üçün strateji yenidənqurma planının hazırlanmasına kömək edir. Bundan başqa, əhali sayının proqnozlaşdırılması, mövcud tullantı idarəçiliyi sistemi, tullantıların tərkibinin tədqiqi, institusional və maliyyə analizi, tariflərin öyrənilməsi və hüquqi aspektlər üzrə analitik təhlillərin aparılması planlaşdırılır.
Balaxanı poliqonu daxil olmaqla, tullantı poliqonlarının bərpası və ya bağlanması üzrə məsləhət xidmətlərinin həyata keçirilməsi üçün Yunanıstanın "Harress Pikel Consult AG" şirkəti ilə imzalanmış müqaviləyə əsasən, Balaxanı tullantı poliqonu daxil olmaqla Bakı şəhəri ərazisində yerləşən tullantı poliqonlarının bərpası və ya bağlanması layihəsini həyata keçirməklə Bakı şəhəri ərazisində tullantıların idarə edilməsi sisteminin təkmilləşdirilməsi və bərk məişət tullantılarının ətraf mühitə zərərli təsirinin azaldılması nəzərdə tutulur.
Bundan başqa, poliqonlarının bərpası və ya bağlanması nəticəsində ətraf mühitə ekoloji təsirin qiymətləndirilməsi üzrə məsləhət xidmətlərinin həyata keçirilməsi üçün Azərbaycanın "ACEP" şirkəti seçilib.
DB bu layihənin həyata keçirilməsini uğurlu sayır. Bunu Balaxanı poliqonunda aparılan işlərin nəticələri təsdiq edir. Onun vəziyyəti iki il bundan əvvəlki vzəiyyətdən fərlənir.
Layihə DB-nin Direktorlar Şurası tərəfindən 2008-ci ilin iyununda bəyənilib. Layihənin həyata keçirilməsi 2009-cu ildə başlayıb və 2013-cü ilədək davam edəcək. Layihənin ümumi dəyəri 41,5 milyon dollar təşkil edir. Bunun 29,5 milyon dolları bankın kredit payı, qalanı isə Azərbaycan hökuməti tərəfindən maliyyələşdiriləcək. Kredit 20 il müddətinə verilib.
Layihə çərçivəsində tədbirlər beş istiqamət - təsisat islahatları, potensial və idarəetmənin artırılması, Balaxanı bərk tullantılar poliqonunun nizamlanması və idarəedilməsi, digər poliqonların və idarələrin bağlanması, bərk tullantıların yığılması üçün avadanlıq, layihə başa çatandan sonra investisya planının hazırlanması.
Azərbaycanda Bakı və Abşeronda bütün məişət tullantılarının yerləşdirilməsi, zərərsizləşdirilməsi və utilizasiyası ilə məşğul olan "Təmiz şəhər" ASC yaradılıb. Bununla yanaşı, tullantıların yığılması və çatdırılması Bakı şəhər İcra Hakimiyyətinin öhdəliyində qalıb. ASC-nin yaradılmasında əsas məqsəd Bakı və Abşeronda ekoloji vəziyyətin yaxşılaşdırılmasıdır. Onun fəaliyyəti bir neçə əsas istiqamətdə olacaq, məsələn, ildə 500 ton gücə malik məişət tullantılarının yandırılması üzrə zavodun tikintisi sahəsində və yandırılma prosesində 231 milyon kilovat-saat elektrik enerjisinin istehsalı.
