Gürcüstan, Tbilisi, 5 iyul /Trend, müxbir N.Kirsxaliya/
Bakı-Tbilisi-Qars dəmiryol xəttinin açılışı üzrə infrastrukturun tərkib hissəsi olan Axalkalaki dəmiryol stansiyasının tikintisinə üç həftə ərzində başlanacaq. Bu barədə çərşənbə axşamı Trend-ə Gürcüstanın İqtisadi İnkişaf və İnfrastruktur Nazirliyinin mətbuat xidmətindən məlumat verilib.
Məlumata görə, stansiya məşhur alman arxitektoru Yurgen Mayerin layihəsi əsasında tikiləcək.
Ötən həftə Bakıda Azərbaycan və Gürcüstan Bakı-Tbilisi-Qars dəmiryolunun tikintisinə əlavə vəsait ayrılması barədə kredit sazişi imzalayıblar, eləcə də iyulun sonlarında Axalkalaki stansiyasının (Samtsxe-Cavaxetiya regionu) tikinitisinə başlamaq haqqında razılığa gəliblər.
Bakı-Tbilisi-Qars dəmiryolunun Gürcüstan hissəsinin tikintisi üçün Azərbaycan Gürcüstana əlavə 575 milyon dollar ayırıb. Ayrılan vəsaitlər dəmiryolun Tetritskaro-Axalkalaki hissəsinin tikintisinə və bərpasına, Axalkalakidə dəmiryol vağzalının tikintisinə, eləcə də digər dəmiryol infrastrukturunun tikintisinə yönələcək.
2007-ci ildə artıq Azərbaycan dəmiryolun Gürcüstan hissəsinin tikintisinin maliyyələşdiirlməsi və reabilitasiyası üçün 200 milyon dollar həcmində kredit verib.
Yeni kredit də daxil olmaqla, kreditin ümmüumi həcmi 775 milyon dollar təşkil edir. Kredit dəmir yolunun istismarından əldə ediləcək vəsait hesabına ödəniləcək.
Bakı-Tbilisi-Qars dəmiryolunun tikintisi Azərbaycan, Gürcüstan və Türkiyə arasında imzalanan beynəlxalq saziş əsasında həyata keçirilir. Yeni dəmiryol magistralı Asiyadan Avropaya yük dövriyyəsinin artırılmasına və yüklərin çatdırılmasının sürətləndirilməsinə kömək edəcək.
Bakı-Tbilisi-Qars layihəsi çərçivəsində dəmiryol magistralının yeni 105 km.-lik qolunun tikintisi də planlaşdırılır. Bunun 76 km.-i Türkiyə, 29 km.-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda 183 km.-lik Axalkalaki-Marabda-Tbilisi dəmir yolunun 183 km.-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.
