Azərbaycan, Bakı, 6 iyul /Trend, müxbir A.Axundov/
Sənaye sektorunun inkişafı məsələsində Azərbaycan Sumqayıt, Gəncə şəhərləri və Bakının Qaradağ rayonunda yaradılacaq sənaye şəhərçiklərinə ümid edir. Bu barədə çərşənbə günü iqtisadi inkişaf naziri Şahin Mustafayev Dünya azərbaycanlılarının III qurultayında çıxışı zamanı deyib.
Azərbaycan Prezidenti İlham Əliyevin "2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı"nın həyata keçirilməsi üzrə 2011-2015-ci illər üçün təsdiq etdiyi tədbirlər planına əsasən, 2015-ci ilədək ölkədə sənaye zonalarının (biznes şəhərciklərin və biznes inkubatorların) yaradılması nəzərdə tutulur.
2009-cu ilin sonundan Sumqayıtda artıq texnoloji park fəaliyyət göstərir. O, enerji təyinatlı məhsullar buraxır. Bundan başqa, müxtəlif növ məhsulun buraxılacağı bir neçə zavod "Azərsun Holdinq" tərəfindən tikilir. İkinci sənaye şəhərciyinin də Sumqayıtda kimya kompleksinin ərazisində yaradılması planlaşdırılır. Bu sənaye şəhərciyinin ərazisindəki müəssisə ARDNŞ-nin "Azərikimya" İB-nin buraxdığı məhsulun əsasında işləyəcək, lakin bu halda digər strukturların da iştirakı istisna edilmir. "Azərikimya" İB ərazisində sənaye şəhərciyinin yaradılması layihəsi hazırda İqtisadi İnkişaf Nazirliyi ilə birlikdə fəal şəkildə müzakirə edilir.
Üçüncü sənaye parkı Bakının Balaxanı qəsəbəsində müasir texnologiyalardan istifadə etməklə yaradılacaq. Balaxanıda müasir texnologiyalardan isitifadə etməklə bərk məişət tullantılarının çeşidlənməsi, çeşidlənmiş tullantıların təkrar istehsalda istifadəsi üçün yeni müəssisələrin yaradılması planlaşdırılır. Xüsusilə də plastik tullantılar, emal edilən akkumulyator, şin və metalların emalı üzrə müəssisələrin yaradılması planlaşdırılır.
Nazirin sözlərinə görə, dördüncü olacaq daha bir sənaye şəhərciyinin Gəncədə yaradılması nəzərdə tutulur.