Azərbaycan, Bakı, 14 iyul /Trend, müxbir A.Axundov/
Azərbaycanın tibbi sığorta sahəsində lider olan "A-Group" sığorta şirkəti fərdi şəxslərin könüllü tibbi sığortası (KTS) üçün yeni proqram buraxır. Bu barədə cümə axşamı Trend-ə şirkətin idarə heyətinin sədri Anar Bayramov məlumat verib.
"Bildiyiniz kimi, Azərbaycanda KTS əsasən korporativ müştərilər üçün satılır, lakin KTS polisi almaq istəyən əhali təbəqəsi mövcuddur. Təəssüf ki, sığorta şirkətləri fərdi şəxslər üçün KTS polisi satmaqdan qaçırlar, ona görə də biz fərdi şəxslər üçün uyğunlaşdırılmış xüsusi proqram hazırlamışıq", - Bayramov bildirib.
Onun sözlərinə görə, məhsul avqustdan, ən geci sentyabrın əvvəlindən buraxılacaq.
"Hesab edirəm ki, bu məhsul fərdi şəxslər üçün maraqlı olacaq", - Bayramov deyib.
1995-ci ildə yaradılan "A-Group" şirkəti sığortanın 3 icbari və 14 könüllü növü üzrə xidmətlər göstərir. 2010-cu ilin yekunları üzrə şirkətin məcmu kapitalı 4,862 milyon manat təşkil edərək 2009-cu illə müqayisədə 5,33 faiz artıb. "A-Group" ASC-nin ödənilmiş nizamnamə kapitalı il ərzində 71 faiz artaraq 2,65 milyon manat olub.
Bayramovun sözlərinə görə, şirkətin portfelinin təxminən 80 faizi tibbi sığortanın payına düşür.
İyulun 14-nə olan rəsmi məzənnə 0,7865 AZN/USD təşkil edir.