Azərbaycan, Bakı, 20 iyul /Trend, müxbir A.Axundov/
Yaxın 5 ildə Azərbaycanda həyat sığortası üzrə yığımların sığortanın digər növləri üzrə yığımlara bərabər olması mümkündür. "Atəşgah" həyat sığortası şirkətinin idarə heyətinin sədri Əkbər Mədətli belə hesab edir.
Hazırda Azərbaycanda həyat sığortası üzrə 3 şirkət fəaliyyət göstərir. Bunlar "Atəşgah Həyat", "Qala Həyat" və "Paşa Həyat" şirkətləridir. Onlar bu xidmət növünün göstərilməsi üzrə lisenziyaya malikdirlər.
Mədətlinin sözlərinə görə, hazırda demək olar ki, bütün inkişaf etməkdə olan və ya irəliyə getmiş sığorta bazarlarında həyat sığortası üzrə yığımlar "non-life" sığortanın yığımları üzərində üstünlüyə malikdir.
"Biz də bu istiqamətdə gedirik və güman edirəm ki, Azərbaycanda vəziyyət analoji olacaq", - Mədətli bildirib.
2011-ci ilin birinci yarısında həyat sığortası üzrə yığımların ümumi həcmi 1,52 milyon manat təşkil edib. Tətbiqinə 2010-cu ilin dekabr ayından başlanan istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə Azərbaycanın sığorta şirkətlərinin sığorta haqları 12,938 milyon manat olub. Yəniz hazırda həyat sığortasında icbari sığortanın payı 90 faizə çatıb.
Nəzərə alsaq ki, icbari sığorta bazarının potensialı təxminən 30 milyon manat qiymətləndirilir, mövcud 3 şirkət ilin yarısı ərzində artıq bu bazarın yarısını tutublar.
Lakin iyunda bədbəxt hadisələrdən sığorta üzrə yığım templərinin kəskin azalması müşahidə olunub.
İyunda yığımların həcmi yanvar-may ərzindəki göstəricini 8,35 faiz üstələyib, halbuki mayda yığımlar yanvar-aprellə müqayisədə 37,12 faiz, yanvar-martın göstəricisi ilə müqayisədə 46,13 faiz artıb. Martda yanvar-fevral göstəricisi üç dəfə üstələnib.
Hazırda Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə yarım milyona yaxın insan sığortalanıb. Bu növ üzrə öz işçilərini 14 minə yaxın müəssisə sığortalayıb.
Son məlumatlara görə, 6 minə yaxın müəssisə "Atəşgah Həyat"ın, 7500-ə yaxın "Qala Həyat"ın, 300-ə yaxın müəssisə isə "Paşa Həyat"ın şirkətlərin müştərisi olub.
"Paşa Həyat" şirkətinin istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından sığortalanan hüquqi şəxslərin - müştərilərin sayına görə digər "life" şirkətlərdən geri qalmasına baxmayaraq, o, yığımların həcminə görə Azərbaycanın həyat sığortası bazarının lideridir.
Azərbaycan Maliyyə Nazirliyi yanında fəaliyyət göstərən Dövlət Sığorta Nəzarəti Xidmətinin məlumatına görə, ilin birinci yarısında "Paşa Həyat" 6,218 milyon manat məbləğində sığorta haqqı yığaraq həyat sığortası bazarının 43 faizini və ölkənin bütün sığorta bazarının 6,33 faizini tutub. 4,613 milyon manat toplayan "Atəşgah Həyat"ın payına müvafiq olaraq 31,9 və 4,69 faiz, 3,542 milyon manat yığımla "Qala Həyat"ın payına isə müvafiq olaraq 24,5 və 3,6 faiz düşür.