Azərbaycan, Bakı, 3 avqust /Trend, müxbir E.İsmayılov/
Asiya İnkişaf Bankı Bakı-Gürcüstan sərhədi avtomagistralının yenidən qurulması layihəsinin həyata keçirilməsi üçün yol tikintisinə 600 milyon dollar məbləğində ikinci multitranş maliyyələşdirməni (MFF) verməyə hazırdır. Bu barədə Azərbaycanda əməliyyatlar üzrə biznes planda deyilir. Biznes plan 2011-ci ilin iyununda AİB-in Direktorlar Şurasında təsdiq edilib və 2011-2013-cü illəri əhatə edir.
MFF-nin 2013-cü ildə təsdiq edilməsi gözlənilir.
Biznes planda deyildiyinə görə, 200 milyon dollar məbləğdə birinci tranşı 2013-cü ildə ayırmaq planlaşdırılır.
AİB-in 2007-ci ilin avqustunda 500 milyon dollar məbləğində avtomobil yollarının tikintisi üçün təsdiq edilən birinci maliyyələşdirmə paketindən artıq 255,4 milyon dollar ayrılıb. 200 milyon dollar məbləğində birinci tranş Masallı-Astara avtomobil yolunun, ikincisi (55,4 milyon dollar) Gəncə dairəvi yolunun tikintisinə ayrılıb. Masallı-Astara avtomobil yolunun inşası üçün bank əlavə 160-170 milyon dollar (üçüncü tranş) ayırmağa hazırlaşır.
Azərbaycan 1999-cu ildən AİB-in üzvüdür. 2010-cu ilin əvvəlinə bankın ölkə üzrə 14 layihəsinə dair kredit portfeli 660,4 milyon dollar təşkil edib. Əməkdaşlıq dövrü ərzində AİB Azərbaycan hökumətinə və yerli şirkətlərə ümumi məbləği 13,122 milyon dollar olan qrant ayırıb.
AİB 1966-cı ildə yaradılıb və 67 üzvü var. Bankın mənzil-qərargahı Manilada (Filippin) yerləşir. Azərbaycan AİB üzvlüyünə 22 dekabr 1999-cu ildə qəbul edilib və ölkənin bankın kapitalındakı iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.
