Azərbaycan, Bakı, 24 avqust /Trend, müxbir N.İsmayılova/
Azərbaycan bankı "Paşa Bank" 2012-2015-ci illər üzrə üçillik strategiyanın həyata keçirilməsi çərçivəsində beynəlxalq kredit reytinqinin alınmasını planlaşdırır. Trend-in məlumatına görə, bu barədə çərşənbə günü mətbuat konfransında "Paşa Bank"ın idarə heyətinin üzvü və baş maliyyə inzibatçısı Şahin Məmmədov bildirib.
"Bank artıq xarici ekspertləri cəlb edib və ilin sonunadək bütün hazırlıq işlərini başa çatdırmağı planlaşdırır. Biz yeni strategiya çərçivəsində reytinq agentlikləri ilə bilavasitə danışıqlara başlamağı planlaşdırırıq", - Məmmədov deyib.
Onun sözlərinə görə, bank artıq bütün zəruri maliyyə hesabatlarına malikdir. Lakin rəhbərlik hesab edir ki, bank bu prosesə tam institusional hazır olmalıdır.
"Paşa Bank" 2007-ci ilin iyununda yaradılıb və 2007-ci il 28 yanvar tarixindən Azərbaycan Mərkəzi Bankının lisenziyası əsasında fəaliyyət göstərir. Bankın səhmlərinin 60 faizi "Paşa Holdinq", 30 faizi "ADOR ltd", 10 faizi isə Arif Paşayevə məxsusdur.
"Paşa Bank" ASC Paşa Insurance, Paşa Life, Paşa Travel və Paşa Construction ilə birgə klassik deyil, faktiki olaraq investisiya şirkəti olan Paşa Holdinqin tərkibinə daxildir. Paşa Group-un strukturuna səhmlərinin 99,75 faizinin holdinqə aid olduğu Kapital Bank da daxildir.
