Azərbaycan, Bakı, 5 sentyabr /Trend, müxbir N.İsmayılova/
Azərbaycan hökuməti Rusiyanın Həştərxan vilayəti ilə ticari-iqtisadi, elmi-texniki və mədəni əməkdaşlıq haqqında hökumətlərarası saziş imzalamağa hazırlaşır. Bu barədə Trend-ə bazar ertəsi Rusiyanın Azərbaycandakı ticarət namayəndəsi Yuri Şedrin bildirib.
"Sazişin imzalanması Həştərxan vilayətinin qubernatoru Aleksandr Jilkinin rəhbərliyi ilə nümayəndə heyətinin Bakıya ikigünlük səfəri ərzində imzalanacaq", - Şedrin deyib.
Vilayətin rəsmi nümayəndələri ilə yanaşı, heyətə həmçinin işgüzar şəxslər daxildir.
Nümayəndə heyətinin Bakıya səfəri sentyabrın 7-8-də olacaq. Səfər çərçivəsində Azərbaycanın hökumət və ticarət strukturlarının nümayəndələri ilə bir sıra görüşlər keçiriləcək.
İl ərzində Rusiya ilə Azərbaycan arasındakı ticarət mübadiləsi 71,5 faiz artaraq ilin birinci yarısında 1,455 milyard dollar olub. Rusiya ixracatı 58,9 faiz artaraq 776,1 milyon dollar, Azərbaycandan idxal isə 88,5 faiz artaraq 679,2 milyon dollar təşkil edib.
Rusiya-Azərbaycan ticari və iqtisadi əlaqələrində və artan ticarət inkişafında mühüm rolu regionlararası əməkdaşlıq oynayır. Hazırda 15 Rusiya regionu ilə ticari-iqtisadi, elmi-texniki və mədəni əməkdaşlıq haqqında saziş imzalanıb ki, bu, Rusiya Federasiyasının 71 subyektini Azərbaycanla xarici ticarətə cəlb edib.
Şedrin bildirib ki, payızda, Həştərxan nümayəndə heyəti ilə yanaşı, Tambov regionu, Karaçay-Çərkəz və Dağıstan respublikalarından nümayəndə heyətlərinin də ticari-iqtisadi, elmi-texniki və mədəni əməkdaşlıq haqqında saziş imzalamaq məqsədilə Azərbaycana səfəri gözlənilir.
