Azərbaycan, Bakı, 14 sentyabr /Trend, müxbir A.Axundov/
Bakı Fond Birjası (BFB) ölkədə marketmeyker şirkətlərinin yaradılmasına dair təkliflərin qəbuluna hazırdır. Trend-in məlumatına görə, bu barədə çərşənbə günü Bakı Fond Birjasının (BFB) İdarə Heyətinin sədri Xəyal Abdinov bildirib.
"Biz marketmeyker bazarını ayrıca işləyirik, qaydalar yazırıq, İT-sistemlər hazırlayırıq", - Abdinov bildirib.
Onun sözlərinə görə, birja müraciətlər aldığı halda bu institutu işə salmağa hazır olacaq.
"Biz bazar iştirakçılarından təkliflər gözləyirik", - o deyib.
Marketmeyker institutlarının fəaliyyətinin təşviqi və müvafiq normativ-hüquqi bazanın yaradılması üzrə tədbirlərin 2013-2015-ci illər ərzində həyata keçirilməsi nəzərdə tutulub. Həmin tədbirlər "2011-2020-ci illərdə Azərbaycanda qiymətli kağızlar bazarının inkişafı üzrə" Dövlət Proqramı çərçivəsində həyata keçiriləcək.