Azərbaycan, Bakı, 20 sentyabr /Trend, müxbir A.Axundov/
Son dörd il ərzində Azərbaycan fermerlərinə 425-430 milyon manat məbləğində subsidiya verilib. Trend-in məlumatına görə, bu barədə çərşənbə axşamı jurnalistlərə kənd təsərrüfatı naziri İsmət Abasov məlumat verib.
"Hökumət fermerlərə dəstəyin davam etdirilməsini planlaşdırır", - Abasov bildirib.
Kənd təsərrüfatı məhsullarının istehsalçılarına əkin sahəsinin və çoxillik əkmələrin becərilməsində sərf olunan yanacaq və mühərrik yağlarına görə 40 manat məbləğində subsidiya Azərbaycan Prezidentinin "Kənd təsərrüfatı məhsullarının istehsalçılarına dövlət dəstəyi haqqında" sərəncamına uyğun verilir.
57 rayon (şəhər) komissiyasının daxil olduğu Respublika Komissiyası bu il kənd təsərrüfatı məhsullarının istehsalçılarına 51,64 milyon manat məbləğində subsidiya verilməsi barədə qərar qəbul edib.
Rayonlarda təşkil olunmuş 1383 kənd ərazi komissiyası üzrə 381 495 kənd təsərrüfatı məhsullarının istehsalçısına 1 290 883,74 hektar əkin sahəsinin və çoxillik əkmələrin becərilməsində sərf olunan yanacaq və mühərrik yağlarına görə vəsaitlər veriləcək.
Sentyabrın 20-nə olan rəsmi məzənnə 0,7866 AZN/USD təşkil edir.
