Azərbaycan, Bakı, 21 sentyabr /Trend, müxbir A.Axundov/
İlin sonunun yaxınlaşması ilə Bakının ilkin mənzil bazarında nisbi canlanma müşahidə olunur. Bu barədə Trend-ə çərşənbə günü "MBA Group" konsaltinq şirkətinin baş direktoru Nüsrət İbrahimov deyib.
"Daşınmaz əmlak alqı-satqısı üzrə agentliklərə müraciətlərin, eyni zamanda, bağlanmış əqdlərin sayının artması müşahidə olunur", - İbrahimov deyib.
Onun sözlərinə görə, ancaq rəsmiləşdirmə prosesinin uzadılması, əlavə vəsaitlərin tələb olunması, bəzi tikinti şirkətlərində ipoteka kreditlərinə səhlənkar yanaşma çox vaxt potensial müştəriləri çəkindirir.
İbrahimov bildirib ki, avqustda yeni tikililiərdə mənzilin bir kvadratmetrinin orta qiyməti 2,3 faiz artıb. Bu, ötən ilin avqust ayı ilə müqayisədə 1,3 faiz artaraq 800 dollara çatıb.
Avqustda Bakı bazarında 188 yeni tikilidə 1143 mənzil təklif olunub.
"2011-ci ilin avqust ayında ilkin daşınmaz əmlak bazarındakı qiymət artımı ucuz mənzillərin tədricən satışı, təklif portfelində bahalı mənzillərin payının artması ilə birbaşa əlaqədar idi. Məhz buna görə, qiymətlərin indeksi indi stabilləşməyə və yüksəlməyə doğrudur", - İbrahimov deyib.
Onun sözlərinə görə, ilkin bazardakı qiymətlər artıq reallığı əks etdirməyə başlayıb.
"Tikinti şirkətləri bazarda qiymətlərin stabilləşməsinə çalışır, onların kredit portfelinin həcmi artmaqda davam edir. Tikinti şirkətlərinin bir hissəsi öz maliyyə problemlərini tədricən həll edir, digərləri isə bazarı tərk edir", - İbrahimov deyib.
Baş direktorun sözlərinə görə, müşahidələr bazarın özünün böhran vəziyyətinin son məqamlarını yaşadığını deməyə əsas verir.
"Belə vəziyyət 2011-ci ilin ikinci yarısında da davam edəcək", - İbrahimov deyib.
