Azərbaycan, Bakı, 26 sentyabr /Trend, müxbir N.İsmayılova/
"AzMeCo" şirkəti gələcəkdə Azərbaycanda metanolun təkrar emalının artımı hesabına istehlakın artacağını gözləyir. Bu barədə Trend-ə şirkətin idarə heyətinin sədri Nizami Piriyev deyib.
"Bugün ölkədə metanol istehlakı çox aşağı səviyyədədir, ancaq biz gözləyirik ki, istehlak vaxt keçdikcə artacaq. Bizim əsas məqsədimiz ölkə daxilində emala göndərilən metanolun payını maksimal dərəcədə artırmaqdır", - Piriyev deyib.
Onun sözlərinə görə, dövlət hər il "AzMeCo"ya 650 milyon kubmetr qaz tədarük edəcək ki, müəssisə bununla 720 min ton metanol istehsal edəcək.
"Gələcəkdə bizə əlavə qaz həcmləri ayrılsa, biz metanol istehsalını daha artıra bilərik", - şirkət rəsmisi deyib.
Piriyevin sözlərinə görə, "AzMeCo" Avropa Yenidənqurma və İnkişaf Bankı ilə işdən faydalı təcrübə qazanıb. Bundan qabaq şirkət AYİB-in layihənin birinci mərhələsi üçün 120 milyon dollar məbləğində ayırdığı vəsaitdən istifadə etməyib.
"Bank bizə maliyyələşdirməni təqdim etməyə hazır idi, lakin o, zavodun baş podratçısının xarici şirkət olmasını tələb edirdi. Biz isə yerli tikinti şirkətləri və xarici mütəxəssislər cəlb etməklə qənaət edə bildik", - o deyib.
Piriyev gələcəkdə AYİB ilə yeni layihələrdə əməkdaşlıq imkanlarını istisna etməyib.
"AzMeCo" 2007-ci ildə yaradılıb. Şirkət öz portfelinə Xəzər hövzəsindəki beynəlxalq karbohidrogen layihələrinin əlavə edilməsi ilə Azərbaycanın qeyri-neft sektoruna investisiya qoyuluşunun baş planını hazırlayıb.
Metanol zavodu Cənubi Qafqazda və Orta Asiyada yeganə zavod olacaq. O, 2012-ci ildə istismara veriləcək. Ölkədə metanol istehsalının gücü 2012-ci ilin sonlarında ildə 720 min ton təşkil edəcək.
Zavodun tikinti layihəsinin ümumi dəyəri 360 milyon dollardır, bu gün layihənin maliyyələşdirilməsi artıq başa çatıb.