Azərbaycan, Bakı, 12 oktyabr /Trend, müxbir N.İsmayılov/
2012-ci ildə Azərbaycanın İqtisadi İnkişaf Nazirliyi yanında Sahibkarlığa Kömək Milli Fonduna (SKMF) dövlət büdcəsindən 90,1 milyon manat vəsait ayrılacaq. Bu barədə Maliyyə Nazirliyinin rəsmi saytında dərc olunmuş Azərbaycanın 2012-ci il və sonrakı üç il üzrə dövlət və icmal büdcələrinin layihəsində deyilir.
Məlumata görə, bu həcm 2011-ci ilin analoji göstəricisini 2,6 dəfə, yaxud 56,1 milyon manat üstələyir. Ümumilikdə, 2006-2011-ci illərdə SKMF-yə sahibkarlıq subyektlərinin güzəştli şərtlərlə maliyyələşdirilməsi üçün dövlət büdcəsindən 453,1 milyon manat vəsait ayrılıb.
SKMF 1992-ci ildə yaradılıb. Sahibkarlara kreditlərin verilməsi ümumi sayı 39 təşkil edən müvəkkil banklar və bank olmayan kredit təşkilatları vasitəsilə həyata keçirilir. 2011-ci ildə Fond 125 milyon manat məbləğində güzəştli kreditlərin verilməsinin maliyyələşdirilməsini planlaşdırır.
Bundan başqa, əvvəl verilən kreditlərin qaytarılması hesabına ümumi məbləği 91 milyon manat olan kreditlərin maliyyələşdirilməsi gözlənilir. 34 milyon manat isə dövlət büdcəsinin vəsaiti hesabına veriləcək. 2011-ci ilin əvvəlindən SKMF 1314 sahibkara ümumi məbləği 107,8 milyon manat olan güzəştli kreditlər verib.
Oktyabrın 12-nə rəsmi məzənnə 0,7868 AZN/USD təşkil edir.
