Azərbaycan, Bakı, 20 oktyabr /Trend, müxbir N.İsmayılova/
İspaniya malları Azərbaycanın idxalının ümumi həcminin yalnız 0,4 faizini təşkil edir. Bunu Trend-ə cümə günü Azərbaycana ilk dəfə rəsmi səfər edən İspaniyanın xarici ticarət üzrə dövlət katibi Alfredo Bonet deyib. Dövlət katibinin Bakıya səfəri oktyabrın 19-20-də baş tutub.
"İspaniya Azərbaycana tikinti materialları, kimya və əczaçılıq sənayesi məhsulları ixrac edir. Bu, məhsulların kifayət qədər şaxələndirilmiş xəttidir, lakin çox məhdud həcmdə" , - Bonet bildirib.
Onun sözlərinə görə, İspaniyanın Azərbaycana ixracı ildə 20-30 milyon avronu keçmir və bu, çox aşağı göstəricidir.
"Öz növbəsində, Azərbaycanın İspaniyaya ixracının 99 faizini neft və neft məhsulları təşkil edir", - Bonet bildirib.
Dövlət katibinin sözlərinə görə, Azərbaycanın ixracat strukturu ölkənin iqtisadi strukturunu əks etdirir. Neft-qaz sektorunun Azərbaycan iqtisadiyyatında xüsusi çəkisi kifayət qədər yüksək olduğundan, hökumətin əsas vəzifələrindən biri iqtisadiyyatın şaxələndirilməsidir.
"Diversifikasiya prosesi başa çatan kimi ölkədən ixracat da şaxələndiriləcək", - o deyib.
Azərbaycan Dövlət Statistika Komitəsinin məlumatına görə, Azərbaycan ilə İspaniya arasında mal dövriyyəsi 2011-ci ilin yanvar-avqustunda 298,2 milyon dollar təşkil edib. Burada Azərbaycan ixracatının payına 283,7 milyon dollar düşür.