Azərbaycan, Bakı, 20 oktyabr /Trend, müxbir A.Axundov/
Beş tikinti şirkəti inşa etdiyi yeni tikililərlə bağlı qəbul komissiyasından rəy almaq üçün hələ də Azərbaycanın Fövqəladə Hallar Nazirliyinə (FHN) müraciət etməyib. Trend-in məlumatına görə, bunu cümə axşamı jurnalistlərə FHN-in Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov deyib.
"İki il əvvəl ölkədə istismarda olan və qəbul komissiyasından keçməyən 200-dən çox yeni tikili olub. Bir il ərzində aparılan işlər nəticəsində onların sayı 50-yə qədər azalıb, yarım il əvvəl onların sayı 36-ya çatıb. Hazırda yoxlamalar üçün bizə yalnız beş şirkət müraciət etməyib", - Əsədov bildirib.
Onun sözlərinə görə, FHN bu şirkətləri yoxlamalara cəlb etmək, eyni zamanda, qəbul komissiyasından keçməyən və istifadəyə verilməyən yeni tikililərdə məskunlaşmanın qarşısını almaq üçün işlər aparır.
"Yararlı olub-olmadığına dair rəy verilməyən yeni tikililərın sakinlərinə kupçi verilə bilməz. Bundan başqa, bu cür yeni tikililərə qaz verilmir. Biz, həmçinin belə binalarda yaşayan vətəndaşları bu prosedə iştirak etməyə dəvət edirik. Onlar bu cür tikinti şirkətlərinin sahiblərini məhkəməyə verə bilərlər", - Əsədov deyib.
O əlavə edib ki, sosial və və yaşayış obyektləri üçün dövlət qəbul komissiyaları yerli icraedici orqanların nümayəndələrindən formalaşır. Sənaye və digər obyektlər üçün isə müvafiq nazirliklərin nümayəndələrindən yaradılır.
Əsədovun sözlərinə görə, inşa edilmiş yeni tikililərdə aşkar edilən əsas çatışmazlıqlar layihə sənədlərinin vaxtında təqdim edilməməsi və bəzi hallarda layihədən kənar çıxılmasıdır.
"FHN bu cür çatışmazlıqların aşkar edilməsi və aradan qaldırılması üzrə iş aparır", - Əsədov deyib.
O, həmçinin hesab edir ki, bazarda tikinti şirkətlərinin sayı kifayət qədər deyil.
"Hazırda bu sahədə fəaliyyət göstərmək üçün təxminən 150 tikinti şirkəti lisenziya alıb. Bazar isə onların sayının 10 dəfə çox olmasını tələb edir", - Əsədov bildirib.
Onun sözlərinə görə, Azərbaycanda tikinti şirkətlərinin lisenziyalaşdırılmasına ehtiyac saxlanılır.
