Azərbaycan, Bakı, 31 oktyabr /Trend, müxbir A.Axundov/
Bir gün əvvəl Almaniyanın Baden-Baden şəhərində başa çatan təkrar sığortaçıların və brokerlərin illik simpozium və forumunda Azərbaycanın sığorta bazarına böyük maraq qeydə alınıb.
Bu barədə Trend-ə bazar ertəsi forum çərşivəsində ölkənin sığorta bazarının imkanlarının təqdimatını keçirən Azərbaycan Sığortaçılar Assosiasiyasının (ASA) icraçı direktoru Azər Əliyev deyib.
"Azərbaycanda sığorta işinin inkişafına həsr edilən mərasimdə Azərbaycan bazarının potensialı və imkanları, həyata keçirilən fəaliyyətlər və yeniliklər barədə söhbət açılıb. Təqdimat böyük marağa səbəb olub. Belə ki, təqdimatda təxminən 180-200 qonaq iştirak edib", - Əliyev deyib.
Onun sözlərinə görə, bu cür təqdimatların keçirilməsi xarici investorların Azərbaycan bazarına marağını artırır və gələcəkdə onların bazara girişinə səbəb ola bilər.
"Eyni zamanda şirkətlər arasında fərdi səviyyədə əlaqələr olub. Bu, Azərbaycan və xarici sığortaçılar arasında yeni müqavilələrln bağlanması ilə yekunlaşa bilər" , - Əliyev bildirib.
Onun sözlərinə görə, bu il ASA belə mərasimlərin keçirilməsini planlaşdırmır.
"Əgər bugünkü kimi Azərbaycanın sığorta bazarı haqqında dünya ictimaiyyətinə danışmağa tələbat yaranarsa, gələcəkdə bu cür mərasim təşkil etməyimiz istisna edilmir", - Əliyev deyib.
O bildirib ki, Almaniyada Azərbaycan sığorta bazarının imkanlarının təqdimatının baş sponsorları Azərbaycanın yeganə təkrar sığorta şirkəti "AzRe" və Beynəlxalq Sığorta Şirkəti olublar. Bundan başqa, "Standard Insurance" və "Atəşgah Həyat" sponsorlar qismində çıxış ediblər.
Hər il Baden-Badendə keçirilən təkrar sığortaçıların və brokerlərin simpozim və forumu qarşıdakı il üçün beynəlxalq sığortada mövcud trendlərin qiymətləndirilməsi və təkrar sığortalanma fəaliyyətinin planlaşdırılması üzrə ən iri beynəlxalq mərasimlərdən biridir.
Hazırda Azərbaycanda ASA-nın üzvləri olan 28 sığorta və 1 təkrar sğorta şirkəti işləyir. Bununla yanaşı, müvəqqəti olaraq sığorta fəaliyyəti üzrə "Fidan Sığorta"nın işi dayandırılıb.
