Azərbaycan, Bakı, 10 noyabr /Trend, müxbir İ.Xəlilova/
İslam İnkişaf Bankı (İİB) noyabrda Azərbaycan hökuməti ilə Zərdab-Ucar-Ağcabədi yolunun modernləşdirilməsi və yenidən qurulması üzrə qrant sazişinin yekun variantını imzalamağı planlaşdırır. Bu barədə cümə axşamı Trend-ə bankın Bakı ofisindən məlumat verilib.
Bu ilin yayında İİB Azərbaycana yol layihəsinin texniki-iqtisadi əsaslandırılmasi (TİƏ) üçün texniki kömək qismində 294 min dollar həcmində qrant ayrılmasını bəyənib.
"Artıq qrant sazişinin razılaşdırılması üzrə dövlətdaxili prosedurlar başa çatıb və onun imzalanması üçün səlahiyyət təqdim edilib", - bankdan deyiblər.
Layihə yeni əməkdaşlıq proqramı (2011-2013-cü illər üzrə) çərçivəsində maliyyələşdiriləcək, maliyyələşdirmə həcmi TİƏ-nin hazırlanmasından sonra müəyyənləşəcək.
Azərbaycan 1992-ci ildən İİB-in üzvüdür və hazırda bankın ölkə üzrə portfeli 700 milyon dollara çatır ki, bu vəsait iqtisadiyyatın müxtəlif sahələrində layihələrin həyata keçirilməsinə ayrılıb.
İİB kreditin maksimal məbləğini bir layihə altında təqribən beş dəfə artıraraq Azərbaycanda layihələrin maliyyələşdirilməsinə yanaşmanı dəyişib. Əgər əvvəllər İİB bir layihənin maliyyələşdirilmə limitini 30-40 milyon dollar həddində müəyyənləşdirmişdisə, hazırda bank 150 milyon dollar ayıra bilər.
Yeni strateji əməkdaşlıq çərçivəsində limitin yüksəldilməsi sayəsində ilk dəfə olaraq layihələrin iriləşdirilməsi, yəni bir neçəsinin bir layihə altında birləşdirilməsi təklif edilib. Ölkədə bu cür layihənin həyata keçirilməsinə bank 200 milyon dollar ayırıb.
İİB-in Azərbaycanla 2011-2013-cü illərdə əməkdaşlıq üzrə yeni proqramının qiyməti 1,4 milyard dollar təşkil edir. Bankın kapıtalında ölkənin iştirak payı 0,13 faizdir.
İİB 1975-ci iildə təsis edilib. Bankın kapitalı təsis edildiyi gündən 15 dəfə, yəni 2 milyard İslam dinarından (İslam dinarı İİB-in hesabının pul vahididir və Beynəlxalq Valyuta Fondunun bir xüsusi ekvivalentinə uyğundur) 30 milyard İslam dinarınadək artıb.
