Azərbaycan, Bakı, 14 noyabr /Trend, müxbir A.Axundov/
Azərbaycan Nəqliyyat Nazirliyi özəl sektoru Bakıda yeraltı avtomobil dayanacaqlarının tikintisində iştirak etməyə dəvət edir. Trend-in məlumatına görə, bu barədə bazar ertəsi jurnalistlərə Azərbaycanın nəqliyyat naziri Ziya Məmmədov deyib.
"Biz əlaqəli şəxsləri bizimlə görüşməyə və nazirliyin səlahiyyətində olan dayanacaqların tikintisi üzrə məsələləri müzakirə etməyə dəvət edirik", - nazir bildirib.
Nazirliyin apardığı araşdırmalara əsasən, Bakıda təqribən 100 yeraltı avtomobil dayanacağının tikilməsinə tələbat var.
Əvvəl məlumat verilib ki, iri dayanacaq meydançaları şəhərin bütün girişlərində - "Məşədi Əzizbəyov" metrostansiyası yaxınlığında, Bakı avtovağzalında, "Azneft" meydanında, şəhərə Zığ tərəfdən girişdə, "Xalqlar dostluğu" metrostansiyasının yaxınlığında açılacaq.
Dayanacaqların tikintisi layihələrinin maliyyə mənbələri müxtəlif - dövlət büdcəsi, beynəlxalq maliyyə təşkilatları (Dünya Bankı, Asiya İnkişaf Bankı), özəl sektor hesabına ola bilər.
Hazırda Bakı şəhərinin nəqliyyatının inkişafı üçün investisiya proqramı hazırlanır. Bunun maliyyələşdirilməsi üçün Asiya İnkişaf Bankı 300 milyon dollar ayırmağı planlaşdırır. Bank bu kreditin ilk tranşını 2013-cü ildə ayırmağa hazırdır.
