Azərbaycan, Bakı, 21 noyabr /Trend, müxbir A.Axundov/
Oktyabrda Bakının ilkin mənzil bazarında bir kvadratmetrin orta qiymətinin 1,8 faiz azalmasına baxmayaraq, bu, ötən ilin analoji dövrü ilə müqayisədə 4,9 faiz artaraq 819 dollara çatıb. Bu barədə bazar ertəsi Trend-ə "MBA Group" konsaltinq şirkətinin baş direktoru Nüsrət İbrahimov deyib.
"Bazarda ucuz mənzillərin tədricən satışı və təkliflər portfelində bahalı mənzillərin payının artması ona gətirib çıxarıb ki, son ildə qiymətlərın artım tendensiyası olub", - İbrahimov bildirib.
Onun sözlərinə görə, Bakının ilkin mənzil bazarında qiymətlərin indeksi tədricən artır.
"Təkliflər portfelində orta qiymətdən artıq satışa çıxarılan mənzillərin payı artır, bir çox çoxotaqlı yaşayış binalarında satışa çıxarılan mənzillərin sayı isə kəskin azalıb. Kütləvi yaşayış binalarının tikintisindən fərqli olaraq, biznes və elit binaların tikintisində problemlər tədricən aradan qaldırılır", - o bildirib.
İbrahimovun sözlərinə görə, bazarda qiymətlər təkliflər portfelində struktur dəyişiklikləri hesabına artır, tikinti şirkətləri qiymətləri sabitləşdirməyə çalışırlar, tikinti şirkətlərinin kredit portfelinin həcmi artır ki, bu da qiymətlərin artımına səbəb olur.
"Tikinti şirkətlərinin bir hissəsi tədricən öz maliyyə problemlərini həll edirlər, digərləri isə bazarı tərk edirlər", - İbrahimov deyib.
Onun sözlərinə görə, bütün bunlarla yanaşı, ilkin mənzil bazarında qeyri-yaşayış obyektlərinin qiymətlərində də son il ərzində artım tendensiyası müşahidə edilib.
"Müşahidələr deməyə əsas verir ki, bazar böhran dövrünü yaşamağa davam edir", - İbrahimov bildirib.