Azərbaycan, Bakı, 24 noyabr /Trend, müxbir İ.Xəlilova/
Bu gün Azərbaycanda vergi yükü məqbul səviyyədədir. Trend-in məlumatına görə, bu barədə cümə axşamı vergilər naziri Fazil Məmmədov parlamentdə 2012-ci il və sonrakı üç il üçün dövlət büdcəsi layihəsinin müzakirəsində bildirib.
"Azərbaycan açıq iqtisadiyyata malikdir, ona görə də hökumət xarici kreditlərin cəlb edilməsinədək onları ciddi analiz edir. Bundan başqa, bu gün Azərbaycanın valyuta ehtiyatları digər dövlətlərə də kreditlərin ayrılmasına imkan verir, ona görə də ölkə öz iqtisadiyyatı ilə bağlı hər hansı qərar qəbul edərkən çox ehtiyatlıdır", - nazir deyib.
Onun sözlərinə görə, sosial vergilər nəzərə alınmaqla Almaniyada vergi yükü 40 faiz, Avstriyada 44 faiz, Belçikada 47 faiz, Danimarkada isə 49 faiz təşkil edir.
Ümumilikdə, Avropa İttifaqı üzrə vergi yükü 39,5 faiz, Azərbaycanda isə bu göstərici sosial ayırmalar nəzərə alınmaqla 21,5 faiz, onlar nəzərə alınmadan 17,9 faizdir.
"Azərbaycanda sahibkarlığın fəaliyyət göstərməsi üçün infrastrukturun yaradılması, inzibati prosedurların və biznesin qeydiyyatı prosedurunun sadələşdirilməsindən tutmuş güzəştli şərtlərlə maliyyələşdirməyə qədər hər cür şərait yaradılıb, - nazir deyib. - Bu il vergi dərəcələrinin bizdəkindən aşağı olduğu ölkələrdən fərqli olaraq Azərbaycan iqtisadiyyatına 9 milyard manatdan artıq sərmayə yatırılıb. Həm də bu sərmayələrin əsas hissəsi daxili və özəl kapital qoyuluşlarının payına düşür", - Məmmədov deyib.
Nazirin sözlərinə görə, bu, ölkə iqtisadiyyatının davamlı olduğunu, düzgün iqtisadi və büdcə siyasətinin yürüdüldüyünü növbəti dəfə təsdiqləyir.
