Azərbaycan, Bakı, 7 dekabr /Trend, müxbir A.Axundov/
Azərbaycan hökuməti əhalinin kənd təsərrüfatında məşğulluq payının azaldılmasına çalışır. Trend-in məlumatına görə, bu barədə çərşənbə günü Azərbaycan Prezidenti Administrasiyasının Aqrar siyasət məsələləri şöbəsinin müdiri Azər Əmiraslanov Bakıda "Müstəqilliyin 20 illiyi: mütərəqqi, ədalətli və dinamik dövlət quruculuğuna gedən yolda əldə olunmuş nailiyyətlər və qarşıya çıxan çətinliklər" mövzusunda keçirilən beynəlxalq konfransda çıxışı zamanı deyib.
"2010-cu ildə məşğul əhalinin 38 faizi kənd təsərrüfatına cəlb edilib ki, bu da olduqca yüksək göstəricidir. Gələcəkdə ölkənin aqrar siyasəti bu payın azaldılmasına və iqtisadiyyatın qeyri-neft sektorunun qeyri-aqrar sahələrində işçilərin sayının çoxaldılmasına yönəldiləcək. Bunu kənd təsərrüfatı məhsullarının məhsuldarlığını artırmaq hesabına etmək mümkün olacaq", - Əmiraslanov bildirib.
Onun sözlərinə görə, 2010-cu ilin yekunları üzrə kənd təsərrüfatının ölkənin ümumi daxili məhsulundakı (ÜDM) payı 5,4 faiz, qeyri-neft ÜDM-də 12 faiz, əsas fondlarda 7,9 faiz təşkil edib, ölkə iqtisadiyyatındakı 4,4 faiz investisiya və 4,4 faiz kredit qoyuluşları kənd təsərrüfatı sektoruna yönəldilib.
Ötən ilin yekunları üzrə Azərbaycanda 2 336 kənd təsərrüfatı müəssisəsi və 2818 özəl təsərrüfat olub. Əmiraslanovun fikrincə, kənd təsərrüfatının gəlir səviyyəsi aşağı olaraq qalır. Gələcəkdə ölkənin siyasəti bu sahənin gəlir səviyyəsinin artırılmasına yönəldiləcək.
"Azərbaycanın aqrar siyasətinin əsas prinsipləri bu sahəyə innovasiyanın tətbiqi, səmərəliliyin yüksəldilməsi, eləcə də istehsalçıların, emalçıların və istehlakçıların maraqlarını koordinasiya etməkdir", - Əmiraslanov söyləyib.
Onun sözlərinə görə, Azərbaycanın aqrar sektoru böyük ixracat potensialına malikdir.
"Kənd təssərrüfatı məhsullarının 76 faizi Rusiyaya ixrac edilir və bu gün ixracat marşrutlarının şaxələndirilməsinə, regionların əhatə dairəsinin genişlənməsinə, xüsusilə də Avropa ölkələrinin payının artırılmasına zərurət var. Avropa və Asiyada potensialı 60-70 milyard dollar olan bazarlar mövcuddur və Azərbaycanın kənd təsərüfatı məhsullarının bu bazarlara çıxış imkanları da var", - Əmiraslanov deyib.
O hesab edir ki, daxili bazarı məhdud imkanlı olan ölkə digər ölkələrin bazarlarına yönəlməlidir. Bunun üçün istehsal edilən məhsulun keyfiyyətini və həcmini artırmaq lazımdır. Onun sözlərinə görə, Azərbaycanın torpaq fondunun 55 faizi kənd təsərrüfatı məqsədləri üçün yararlıdır.
"Əgər digər ölkələrlə müqayisə etsək, bu olduqca yaxşı göstəricidir. Azərbaycanda kənd təsərrüfatı üçün yararlı olan torpağın hər hektarına düşən büdcə xərclərinin səviyyəsi 192 dollar təşkil edir. Bu səviyyə olduqca yüksəkdir", - Əmiraslanov vurğulayıb.
Onun sözlərinə görə, son 12 il ərzində kənd təsərrüfatı sahəsinə ayrılan büdcə xərcləri xeyli artıb. Əgər 2000-ci ildə xərclər 34 milyon manat səviyyəsində idisə, 2012-ci ildə xərclərin 472 milyon manat səviyyəsində olması nəzərdə tutulub.
Dekabrın 7-nə olan rəsmi məzənnə 0,7864 AZN/USD təşkil edir.
