Azərbaycan, Bakı, 19 dekabr /Trend, müxbir A.Axundov/
Azərbaycanın sığorta bazarı cari artım tempini gələn il də qoruyacaq. Bu barədə bazar ertəsi Trend-ə Maliyyə Nazirliyi yanında Dövlət Sığorta Nəzarəti Xidmətinin rəisi Namiq Xəlilov deyib.
"2012-ci ildə bazar təxminən 30 faiz arta bilər. Əgər biz ilin sonuna qədər 200 milyon manat toplamağı planlaşdırırıqsa, gələn ilin sonuna 260-270 milyon manat proqnozlaşdırmaq olar", - Xəlilov bildirib.
Onun sözlərinə görə, bu artım "İcbarı sığortalar haqqında" qanunun işə başlaması hesabına da şərtlənib.
"Yeni qanunun bilavasitə təsiri isə geniş və uzunmüddətli olacaq. İcbarı sığortanın normal inkişafı sığortanın könüllü növlərini stimullaşdırır", - Xəlilov qeyd edib.
"İcbari sığortalar haqqında" qanun icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyət, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.
Ölkədə fəaliyyət göstərən bütün şirkətlərin mükafatlarının ümumi həcmi ilin ilk 10 ayında 179,097 milyon manat (ildə 37,45 faiz artım) təşkil edib, hesabat dövründə ödənişlər isə 48,53 milyon manat həcmində (17,59 faiz artım) həyata keçirilib.
Azərbaycanda 28 sığorta və 1 təkrar sığorta şirkəti fəaliyyıət göstərir. Bundan əlavə, "Fidan Sığorta" və "Günay Sığorta" şirkətlərinin sığorta fəaliyyəti üzrə lisenziyaları dayandırılıb.
Dekabrın 19-na olan rəsmi məzənnə 0,7864 AZN/USD təşkil edir.