Azərbaycan, Bakı, 23 dekabr /Trend, müxbir A.Axundov/
Cümə günü Milli Məclisdə birinci oxunuşda müzakirə edilən Tikinti və Şəhərsalma Məcəlləsi layihəsində tikintisinə icazə tələb olunmayan obyektlərin siyahısı müəyyənləşib.
Trend-in məlumatına görə, aşağıdakı tikinti obyektlərinin tikinitisinə icazə tələb olunmur:
- hündürlüyü ən çoxu 5 metr, sahəsi 50 kvadratmetr olan birmərtəbəli yardımçı tikililər;
- xüsusi mülkiyyətdə olan torpaq sahələrində və özəl təsərrüfat sahələrinin hüdudlarında həcmi ən çoxu 60 kubmetr və dərinliyi ən çoxu 3 metr olan quyular, yeraltı su və çirkab su anbarları (rezervuarlar);
- hündürlüyü ən çoxu 5 metr, sahəsi ən çoxu 70 kvadratmetr olan kənd təsərrüfatı obyektləri;
- hündürlüyü ən çoxu 2 metr 20 santimetr olan və qonşu torpaq sahəsi ilə sərhəddə və ya küçə boyunca hasarların (təbii və süni daşdan olan hasarlar da daxil olmaqla);
- hündürlüyü ən çoxu 8 metr olan enerji və ya işıqlandırma dirəklərinin, antena qüllələrinin və ya tutumu ən çoxu 10 kubmetr olan su çənləri qüllələrinin;
- məzarlıq abidələrinin, xatirə lövhələrinin və ya konstruksiyalarının;
- kiçik memarlıq formalarının (köşklər, örtüklər, çiçəkliklər və buna bənzər digər obyektlərin), açıq idman və ya oyun meydançalarının, açıq avtomobil dayanacaqlarının;
- tutumu 100 nəfərə qədər olan müvəqqəti tikililərin;
- binaların fasadlarında və ya damlarında quraşdırılan, lövhəsinin üz sahəsi ən çoxu 30 kvadratmetr olan reklam qurğularının;
- fasadının mövcud qabaritləri dəyişdirilmədən təmir edilən tikinti obyektlərinin;
- təmir edilən yol və ya mühəndis-kommunikasiya təminatı şəbəkələrinin (xətlərinin);
- fərdi yaşayış evlərinin həyətyanı sahələrində hündürlüyü ən coxu 3 metr və sahəsi ən çoxu 50 kvadratmetr olan yardımçı tikililərin;
- hündürlüyü ən çoxu 3 metr və sahəsi ən çoxu 50 kvadratmetr olan istixanaların və oranjereyaların.