Azərbaycan, Bakı, 14 yanvar /Trend, müxbir A.Axundov/
Azərbaycan Dövlət Gömrük Komitəsi (DGK) 2011-ci ildə 149 ölkə ilə həyata keçirilən xarici ticarət əməliyyatlarının nəticələrini elan edib. Bu barədə şənbə günü Trend-ə DGK-dən məlumat verilib.
Ölkənin mal dövriyyəsinin ümumi həcmi 36,327 milyard dollar təşkil edib ki, bu da 2010-cu ilin göstəricisini 29,92 faiz üstələyir.
Xarici ticarət əməliyyatlarında 16,815 milyard dollar həcmində müsbət saldo yaranıb.
Bu dövr ərzində xarici ticarət əməliyyatlarına 8540 hüquqi və fiziki şəxs cəlb edilib, onlardan 3843 nəfəri hüquqi, 4697 nəfəri isə fiziki şəxs olub.
2011-ci il ərzində ixrac əməliyyatları 26,571 milyard dollar təşkil edib ki, bu da 2010-cu ilin analoji dövrü ilə müqayisədə 24,39 faiz çoxdur.
İxracatda dövlət sektorunun payı 25,251 milyard dollar (95,03 faiz), özəl sektorun payı isə 1,127 milyard dollar (4,24 faiz) təşkil edib. Fiziki şəxslərdə isə bu göstərici 0,193 milyard dollar (0,73 faiz) olub.
2011-ci il ərzində idxal 9,756 milyard dollar təşkil edib ki, bu da 2010-cu ilin analoji dövrünə nisbətən 47,81 faiz çoxdur.
İdxal əməliyyatlarında dövlət sektorunun payı 3,404 milyard dollar (34,89 faiz), özəl sektorun payı 5,901 milyard dollar (60,49 faiz), fiziki şəxslərin payı isə 0,451 milyard dollar (4,62 faiz) təşkil edib.
2011-ci ildə Azərbaycandan 2082 növ məhsul ixrac edilib, ölkəyə isə 6233 növ məhsul idxal edilib.
