Azərbaycan, Bakı, 25 yanvar /Trend, müxbir N.İsmayılova/
Azərbaycan bankı "Bank of Baku"nun 2011-ci ilin yekunları üzrə balans mənfəəti dekabr ayı ərzində 2,1 faiz artaraq 26,7 milyon manat təşkil edib. Trend-in məlumatına görə, bu barədə bankın balans hesabatında qeyd edilir.
2012-ci ilin əvvəlinə bankın gəlirləri 74,6 milyon manat təşkil edib. Ötən ilin dekabr ayı ərzində bankın aktivləri 4,2 faiz artıb və cari il yanvarın 1-nə 315,2 milyon manat təşkil edib.
Dekabrın nəticələri üzrə bankın depozit portfeli 237,1 milyon manat təşkil edib. Bundan 183,3 milyon manat fiziki şəxslərin əmanətlərinin, 178,2 milyon manat isə təcili depozitlərin payına düşür.
Bu ilin əvvəlinə olan vəziyyətə görə, bankın kredit portfeli 269,3 milyon manat təşkil edib ki, onlardan 223,7 milyon manat istehlak kreditləşməsinə, 43,6 milyon manat isə kommersiya kreditlərinə ayrılıb.
Bankın ümumi kapitalı 53,3 milyon manat təşkil edir. Ödənilən nizamnamə kapitalı 26,18 milyon manata bərabərdir.
"Bank of Baku" 2005-ci ildə iki yerli bankın - "Bank of Baku" ASC və "İlkBank"ın birləşməsi nəticəsində təsis olunub. Hazırda bankın səhmlərinin 40 faizi Türkiyənin şirkətlər qrupu NAB-a, 10 faizi Elçin İsayevə (bankın idarə heyətinin sədri), 29 faizdən çoxu "Azpetrol"a və 21 faizə yaxını fiziki şəxs və "Azİnvest" şirkətinə məxsusdur.
Yanvarın 25-nə olan rəsmi məzənnə 0,7863 AZN/USD təşkil edir.
