Azərbaycan, Bakı, 29 fevral / Trend/
Qiymətli Kağızlar üzrə Dövlət Komitəsi "AtaSığorta" ASC-nin yeni adi sənədsiz adlı səhmlərinin emissiya prospektini qeydə alıb. Trend-in məlumatına görə, bu barədə şirkətin çərşənbə günü yaydığı məlumatda deyilir.
Şirkətdən verilən məlumata əsasən, emissiyanın həcmi 5 milyon manatdır. Qeydə alınmış səhmlərin hər birinin nominal dəyəri 25 manat olmaqla cəmi sayı 200 min ədəd təşkil edir.
Səhmlərin yerləşdirilməsi kütləvi təklif üsulu ilə Bakı Fond Birjasında keçiriləcəkdir. Buraxılmış səhmləri əldə etmək istəyənlər cəmiyyətin səhmlərinin yerləşdirilməsində iştirak edən anderrayter "BROKDİL-AZ" MMC-yə müraciət edə bilərlər.
Səhmlərin tədavülündə məhdudiyyətlər yoxdur. Səhmlərin dəyəri ödənildikdən sonra "AtaSığorta" ASC-nin nizamnamə kapitalı 10 milyon manata çatacaq.