Azərbaycan, Bakı, 15 mart /Trend, müxbir A.Axundov/
Asiya İnkişaf Bankı (AİB) ay ərzində Azərbaycanda su təchizatı sistemi və sanitar xidmətlərin yaxşılaşdırılması üzrə multitranş paketinin ikinci tranşı çərçivəsində kredit sazişinin imzalanmasını gözləyir. Trend-in məlumatına görə, bu barədə cümə axşamı jurnalistlərə AİB-in Azərbaycandakı nümayəndəsi Olli Noroyono bildirib.
"Biz hökumətə kredit sazişinin layihəsini təqdim etmişik, hökumət imzalanmaya hazırlıq üzrə daxili prosedurları başa çatdırır. Gözləntilərimizə əsasən, imzalanma ay ərzində baş tutacaq. Hər şey hökumətin daxili prosedurlarından asılıdır", - Noroyono deyib.
Bu ilin əvvəlində 360 milyon dollar həcmində təsdiq edilən ikinci tranş çərçivəsində vəsaitlər Ağdaş, Göyçay, Naxçıvan və Beyləqanda su təchizatı və kanalizasiya sistemlərinin yaxşılaşdırılması çərçivəsində işlərin başa çatdırılmasına ayrılıb.
Bundan başqa, 2012-ci ilin noyabrında bank layihə çərçivəsində 175 milyon dollar həcmində üçüncü tranşı təsdiq etməyi planlaşdırır.