Azərbaycan, Bakı, 17 mart /Trend, müxbir A.Axundov/
Yaponiya hökuməti Azərbaycanla əməkdaşlığa başladığı dövrdən 2012-ci il yanvarın 1-dək beş layihə üzrə ümumi həcmi 110,3 milyard yen (təqribən 1,423 milyard dollar) olan beş kredit sazişi imzalayıb.
Trend-in məlumatına görə, bu barədə Milli Məclisin təsdiq etdiyi Nazirlər Kabinetinin 2011-ci ildə fəaliyyəti haqqında hesabatda deyilir.
48,18 milyard yen (təqribən 621,5 milyon dollar) dəyərində üç layihənin həyata keçirilməsi artıq başa çatıb, 62,13 milyard yen (təqribən 801,5 milyon dollar) həcmində iki layihənin həyata keçirilməsi davam edir.
İmzalanmış kredit sazişlərinin üçü elektrik enerjisi, biri kimya sənayesi, sonuncusu isə su təchizatı və kanalizasiya sistemlərinin yenidən qurulması sahəsində layihələrin maliyyələşdirilməsini əhatə edir.
Azərbaycan EP-300 zavodunun tikintisi üzrə imzalanmış kredit sazişi çərçivəsində alınmış 9,15 milyard yen (təqribən 118 milyon dollar) məbləğində kredit vəsaitini tam şəkildə geri qaytarıb.
2012-ci il yanvarın 1-dək digər dörd layihələr üzrə ayrılan kreditlərin ümumi həcmindən 48,79 milyon yen (təqribən 629,3 milyon dollar) və ya 48,2 faizi xərclənib.
Cari ilin yanvar ayının 1-dək Yaponiyaya kreditlər üzrə əsas borcdan 4,21 milyard yen (təqribən 54,4 milyon dollar) qaytarılıb.
Ümumilikdə, Yaponiya əməkdaşlığa başladığı dövrdən Azərbaycana 59,74 milyon dollar həcmində 21 qrant ayırıb.