Azərbaycan, Bakı, 28 mart /Trend, müxbir A.Axundov/
2011-ci ildə Azərbaycandan xaricə 31,6 milyard dollar məbləğində neft məhsulları ixrac edilib. Trend-in məlumatına görə, bu barədə çərşənbə günü Azərbaycan Mərkəzi Bankının açıqladığı tədiyyə balansında deyilir.
İxrac edilən malların strukturunda neft-qaz məhsullarının payı 95,3 faiz təşkil edib.
İxrac edilən neft məhsullarının ümumi həcmindən neft emalı məhsullarının payına 1,8 milyard dollar düşür. Ölkədən isə 29,8 milyard dollar həcmində neft daşınıb.
Azərbaycan Beynəlxalq Əməliyyat Şirkəti ixrac edilən neft məhsullarının ümumi həcmindən 28,2 milyard dollar məbləğində neft hasil edib. Digər şirkətlər isə 1,6 milyard dollar həcmində neft ixrac edib, onlardan 114,4 milyon dollar "Şahdəniz" kondensat yatağı, 1500,4 milyon dollar isə ARDNŞ-nin (Azərbaycan Respublikası Dövlət Neft Şirkəti) payına düşür.
Qeyri-neft sektorunun payına düşən ixrac məhsullarının ümumi dəyəri il ərzində 18,7 faiz artaraq 1623,9 milyon dollar təşkil edib.
