Azərbaycan, Bakı, 11 aprel /Trend, müxbir Ə.Həsənov/
2011-ci ilin yekunları üzrə Azərbaycan bankı "Turan Bank"ın aktivləri 2010-cu ilin analoji göstəricisi ilə müqayisədə 32,4 faiz artaraq 165,8 milyon manat təşkil edib. Trend-in məlumatına görə, bu barədə bankın çərşənbə günü yaydığı məlumatda deyilir.
Beynəlxalq audit şirkəti KPMG-nin hazırladığı konsolidə edilmiş audit hesabatına əsasən, bankın kredit portfeli 117 milyon manat təşkil edib ki, bu da inişilin yekunları üzrə analoji göstəricini 16,5 faiz üstələyir. 2011-ci il ərzində bankın xalis gəliri 3,2 milyon manat təşkil edib. Ötən il bankın balans gəliri 3,8 milyon manat səviyyəsində olub.
2010-cu illə müqayisədə bankın ümumi depozit portfeli 59,1 faiz artaraq 86,7 milyon manat təşkil edib.
"Turan Bank"ın məcmu kapitalı 2011-ci il ərzində 9,5 faiz artaraq 23,9 milyon manata çatıb, nizamnamə kapitalı isə 10 faiz artaraq 22 milyon manat olub.
Hesabat "TuranBank"ın və onun törəmə şirkəti olan "TuranLizinq"in fəaliyyətinin nəticələrini əhatə edir.