Azərbaycan, Bakı, 21 aprel /Trend, müxbir A.Axundov/
2011-ci ildəki fəaliyyətin yekunları üzrə Azərbaycanın "Əmrah Sığorta" şirkətinin aktivləri ötən ilin əvvəlinə (4,51 milyon manat) qarşı 23,73 faiz artaraq 5,58 milyon manat təşkil edib. Trend-in məlumatına görə, bu barədə şənbə günü şirkətin rəsmi mətbuatda dərc edilən balans hesabatında deyilir.
Sığorta şirkətinin maliyyə hesabatlılığının auditini "İqtisadçı Audit" MMC aparıb.
2011-ci ilin sonunda şirkətin uzunmüddətli aktivləri il ərzində təqribən 2,78 dəfə artaraq 0,55 milyon manat, qısamüddətli aktivləri isə illik 16,47 faiz artımla 5,02 milyon manat təşkil edib.
2011-ci ildə pul vəsaitlərində və onların ekvivalentlərində 2 milyon manatdan çox vəsait toplanıb, depozit hesablarında 1,33 milyon manat, cari hesabda 0,63 milyon yığılıb.
2011-ci ilin yekunları üzrə "Əmrah Sığorta" şirkətinin ödənilmiş nizamnamə kapitalı 4,5 milyon manat səviyyəsində olub. 2010-cu ilin sonunda bu rəqəm 3,5 milyon manat olub.
Şirkət 2011-ci ili 238 min manat həcmində xalis gəlirlə başa vurub.
Ötən ilin sonuna şirkətin məcmu kapitalı 2010-cu illə müqayisədə 30,91 faiz artaraq 4,74 milyon manat təşkil edib.
Şirkətin nizamnamə öhdəlikləri 5,74 faiz azalaraq 0,84 milyon manat, ümumilikdə kapital və öhdəliklər isə 23,73 faiz artımla 5,58 milyon manat təşkil edib.
Ötən ilin yekunları üzrə şirkətin gəlirləri 1,155 milyon manat, xərcləri isə 0,917 milyon manat olub.