Azərbaycan, Bakı, 24 may / Trend, müxbir E.İsmayılov/
Bakı-Sankt-Peterburq və Bakı-Tümen qatarlarının hərəkəti tezliklə bərpa olunacaq. Bu barədə cümə axşamı "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov Dağıstan ərazisində Açi-İzberbaş mənzilində yük qatarının altında partlayıcı qurğunun partlaması hadisəsini şərh edərkən deyib.
Dağıstan ərazisində partlayış Moskva vaxtı ilə saat 08:10-da baş verib.
Əzməmmədovun dediyi kimi, Bakı-Sankt-Peterburq qatarı artıq iki saatdır, Bakı-Tümen qatarı isə 40 dəqiqədir partlayışın baş verdiyi yerdə dayanıb.
"Hazırda hadisə yerində güc strukturları və təmir işçiləri çalışır. Yaxın bir saat ərzində bu yolda hərəkət bərpa olunacaq", - Əzməmmədov qeyd edib. Bakı vaxtı ilə saat 17:57-də Bakı-Moskva qatarı hadisə yerinə çatacaq. O, paytaxta mayın 25-də saat 06:10-da çatmalı idi.