Azərbaycan, Bakı, 30 may /Trend, müxbir E.İsmayılov/
Dağıstanın İzberbaş şəhərində partladılan yük qatarı Azərbaycana boru və başqa yüklər daşıyırdı. Trend-in məlumatına görə, bu barədə İTAR-TASS Mahaçqaladakı Daxili İşlər İdarəsinə istinadən məlumat verir.
"Partlayıcı qurğu 87 vaqondan ibarət qatarın təqribən 30-cu vaqonunun altında Moskva vaxtı ilə saat 08:40 radələrində işə düşüb", - idarədən bildiriblər.
Partlayış İnçxe-İzberbaş dəmiryol mənzilinin 2352-ci kilometrliyində baş verib. İlkin məlumatlara görə, partlayış relsləri və bir neçə dəmir-beton şpalı zədələyib. Vaqonlardan heç biri relsdən çıxmayıb. Hadisə yerində rayonda başqa partlayıcıların olub-olmadığını yoxlayan mütəxəssislər işləyir.
Yoxlamalar başa çatdıqdan sonra yol mühəndisləri bərpa işlərinə başlayacaqlar.